Aprelin 9-da Mədəniyyət Nazirliyinin Respublika “Xatirə Kitabı” Redaksiyası Sumqayıt Dövlət Dram Teatrında “44 gün – Tarixi zəfər” adlı çoxcildliyin IV cildinin təqdimatını keçirib.
Redaksiyadan “Tehsil365” ə bildirilib ki, “44 gün – Tarixi zəfər” adlı çoxcildliyin IV cildində Sumqayıt şəhəri və Abşeron rayonundan olan cəsur Vətən oğulları haqqında əlifba sırası ilə ensiklopedik məlumatlar yer alıb.
Əvvəlcə şəhidlərin xatirəsi bir dəqiqəlik sükutla yad edilib və Dövlət Himni səsləndirilib.
Sumqayıt Şəhər İcra hakimiyyətinin Müharibə iştirakçıları və şəhid ailələri ilə işin təşkili sektorunun müdiri Tərlan Hacızadə çıxış edərək belə bir nəşri ərsəyə gətirdiyi üçün Respublika “Xatirə Kitabı” Redaksiyasına təşəkkür edib.
Tədbirdə şair-publisist Rəfail Tağızadə, sənətşünaslıq üzrə fəlsəfə doktoru Zülfiyyə Eldarqızı, şəhid Vəliyev Vəlinin atası Kamran Vəliyev, şəhid Təhməzov Pərvinin anası Əsli Təhməzova, şəhid Səmədov Elnurun həyat yoldaşı Səmədova Aynur, şəhid Sadıqov Rəsulun nənəsi Səkinə Rəsulova çıxış edərək Vətən uğrunda şəhid olmuş vətən oğullarının qəhrəmanlıq dolu ömür yolundan danışıblar.
Redaksiyanın baş redaktoru Nəzakət Məmmədova bildirib ki, müasir Azərbaycan dövlətinin qurucusu və memarı, Ümummilli Lider Heydər Əliyevin qayğısı və təşəbbüsü ilə yaradılmış Respublika “Xatirə Kitabı” insan resurslarını əbədiləşdirən tarixi sənəd, müharibə ağrılarını özündə geniş əks etdirən ensiklopedik salnamədir. Redaksiya bu missiyanı öz üzərinə götürərək İkinci Dünya müharibəsi (1941-1945), Əfqanıstan döyüşləri, 20 Yanvar faciəsi, Xocalı soyqırımı, Azərbaycanın ərazi bütövlüyü uğrunda gedən döyüşlərdə həlak olmuş, itkin düşmüş, əsir götürülmüş vətəndaşlarımız, Milli qəhrəmanlarımız haqqında kitablar nəşr etdirir. Bu günədək 17 cild çap olunub.
Diqqətə çatdırılıb ki, redaksiya 44 günlük Vətən müharibəsində şəhid olmuş şəxslərin adlarının və xatirələrinin əbədiləşdirilməsi məqsədilə 4 cilddə kitab çap etdirib.
Sonda “44 gün – Tarixi zəfər” adlı çoxcildliyin IV cildi şəhid ailələrinə təqdim edilib.