Özbəkistanın Əlişir Nəvai adına Daşkənd Dövlət Özbək Dili və Ədəbiyyatı Universiteti nəzdində Dövlət Dilində İşin Əsasları üzrə Təlim və Peşəkar İnkişaf Mərkəzinin rəhbərliyi Milli Kitabxananın qonağı olub.
Bu barədə “Tehsil365” ə Milli Kitabxanadan məlumat verilib.
Bildirilib ki, kitabxananın direktoru, professor Kərim Tahirov Azərbaycan Milli Kitabxanası ilə Özbəkistan Milli Kitabxanası arasında qarşılıqlı əməkdaşlıq çərçivəsində həyata keçirilən tədbirlərdən danışıb, kitabxananın fondunda mövcud olan özbək ədəbiyyatı və ona dair Milli Kitabxananın Beynəlxalq əməkdaşlıq zalında yaradılan, mütəmadi olaraq yenilənən daimi ədəbiyyat bölməsi haqqında qonaqlara məlumat verib. Natiq qeyd edib ki, Azərbaycan Milli Kitabxanasında “Özbəkistan ədəbiyyatı bölməsi” 2019-cu ildə yaradılıb, Özbəkistan Milli Kitabxanasında Azərbaycan ədəbiyyatı guşəsi isə 2024-cü ildə Daşkənddə keçirilən Azərbaycan Mədəniyyəti Günləri çərçivəsində təşkil edilib.
Görüş zamanı mərkəzin rəhbəri filologiya elmləri doktoru, professor İnomcon Azimov Azərbaycan və özbək xalqlarının ədəbi-mədəni əlaqələrinin çoxəsrlik zəngin və keşməkeşli tarixi haqqında danışıb, bu əlaqələrin daha da inkişaf etdirilməsi məqsədilə qarşılıqlı əməkdaşlığın əhəmiyyətindən söz açıb, həmçinin səmimi qəbula görə kitabxananın rəhbərliyinə dərin təşəkkürünü bildirib. Eyni zamanda, qonaq müəllifi olduğu I Türkoloji Qurultay haqqında kitabını Kərim Tahirova hədiyyə edib.
Daha sonra qonaqlar Azərbaycan Milli Kitabxanası ilə tanış olub və Beynəlxalq əməkdaşlıq zalındakı “Özbəkistan ədəbiyyatı bölməsi”nə yeni kitablar hədiyyə ediblər.
Sonda direktor Kərim Tahirov qonaqlara “Azərbaycan Milli Kitabxanası” fotoalbomunu və milli suvenirlər hədiyyə edib.