14–17 aprel 2026-cı il tarixlərində CHARACTERS Müasir Dramaturgiya Hərəkatı “CHARACTERS 2026” pyes müsabiqəsinin qalibi olmuş üç pyesin festival oxunuşlarını keçirəcək.
CHARACTERS-in bədii rəhbəri, dramaturq İsmayıl İman “Tehsil365"ə bildirib ki, oxunuşların keçirilməsi bir neçə məqsədə xidmət edir. Bir tərəfdən, bu, qalib pyeslərin təqdim edilməsi və tamaşaçıların müasir dramaturgiya ilə tanış olması üçün imkandır. Digər tərəfdən, oxunuşlar gələcək tamaşaların yaranması yolunda mühüm mərhələdir.
“Pyes ədəbi mətn kimi müstəqil mövcud ola bilər, lakin müsabiqənin əsas nəticəsi olaraq, yeni tamaşaların yaranmasını görmək istəyirik. Buna görə də ümid edirik ki, müsabiqənin və xüsusilə festival oxunuşlarının nəticəsi olaraq yeni səhnə quruluşları yaranacaq. Bu il klassik oxunuş formasından daha çox gələcək səhnə versiyasının potensialını görməyə imkan verən eskiz formatına üstünlük verdik”, — deyə İman bildirib.
Proqramda cəmi üç pyes təqdim olunsa da, oxunuşların sayı dörd olacaq. Birinci yerə layiq görülmüş Jalə İsmayılın “Quyuda bitən qamışın monoloqu” pyesi iki dəfə təqdim ediləcək — festivalın açılış günündə Azərbaycan Dövlət Mədəniyyət və İncəsənət Universitetinin kiçik səhnəsində SABAH qrupunun tələbələrinin ifasında və bağlanış günündə “Fluxus Space” incəsənət qalereyasında CHARACTERS Teatrının təqdimatında. Festivalın digər məkanları sırasında Azərbaycan Kinematoqrafçılar İttifaqı və Ritual Teatr və Yaradıcılıq Laboratoriyası da yer alır.
Festival proqramı:
14.04.2026 — 12:00
Jalə İsmayıl “Quyuda bitən qamışın monoloqu”
Rejissor: Ülvi Məmmədli (ADMİU-nun SABAH qrupunun tələbələrinin təqdimatında)
Məkan: Azərbaycan Dövlət Mədəniyyət və İncəsənət Universiteti
Ünvan: Bakı, İnşaatçılar prospekti, 39
Giriş dəvətnamə ilədir
15.04.2026 — 19:00
Abdulla Elşadlı “__”
Rejissor: Rəvan Hüseynzadə
Məkan: Ritual Teatr və Yaradıcılıq Laboratoriyası
: Bakı, Vidadi küçəsi, 148
Giriş sərbəstdir (zalın tutumu ilə məhdud)
6.04.2026 — 19:00
Hacı Səfərov “Eyay”
Rejissor: Şəbnəm Xeyrulla
Məkan: Azərbaycan Kinematoqrafçılar İttifaqı
Ünvan: Bakı, Bülbül prospekti, 3
Giriş sərbəstdir (zalın tutumu ilə məhdud)
17.04.2026 — 19:00
Jalə İsmayıl “Quyuda bitən qamışın monoloqu”
Rejissor: Nigar Güləhmədova (CHARACTERS Teatrının təqdimatında)
Məkan: “Fluxus Space” incəsənət qalereyası
Ünvan: Bakı, 28 May küçəsi, 5
Giriş sərbəstdir (zalın tutumu ilə məhdud)