Azərbaycanda pambıqçılığın inkişafında mühüm rol oynamış Bəsti Məsim qızı Bağırova XX əsrin ən tanınmış əmək qəhrəmanlarından biri kimi yadda qalıb.
“Tehsil365” xəbər verir ki, 10 aprel 1906-cı ildə Yelizavetpol qəzasının Abdullabəykürd kəndində anadan olan Bağırova zəhməti və yenilikçi yanaşması ilə kənd təsərrüfatında yeni mərhələnin əsasını qoyub.
O, Azərbaycanda iki əl ilə pambıq yığımı hərəkatının təşəbbüsçüsü kimi tanınır. Bu üsul məhsuldarlığın artmasına, yığım prosesinin sürətlənməsinə və pambıqçılıqda yüksək nəticələrin əldə olunmasına ciddi təsir göstərib. Onun tətbiq etdiyi bu yenilik sonradan geniş yayılaraq digər pambıqçıların da fəaliyyətində mühüm yer tutub.
Bəsti Bağırovanın əməyi dövlət tərəfindən də yüksək qiymətləndirilib. O, iki dəfə – 1947 və 1950-ci illərdə Sosialist Əməyi Qəhrəmanı fəxri adına layiq görülüb. Bu, onun zəhmətinin və kənd təsərrüfatına verdiyi töhfələrin ən ali göstəricilərindən biri hesab olunur.
27 fevral 1962-ci ildə Qasım İsmayılov rayonunun Bağçakürd kəndində vəfat edən Bəsti Bağırova Azərbaycan tarixində əməksevərliyi, fədakarlığı və yenilikçiliyi ilə iz qoymuş görkəmli şəxsiyyətlərdən biri kimi xatırlanır.