Azərbaycan Dillər Universitetində (ADU) Beynəlxalq Münasibətlər və Regionşünaslıq fakültəsi və İnformasiya texnologiyaları kafedrasının birgə təşkilatçılığı ilə “Azərbaycan Respublikasında Rəqəmsal İnkişaf Konsepsiyası” mövzusunda dəyirmi masa keçirilib.
“Tehsil365”in əldə etdiyi məlumata görə, tədbiri giriş sözü ilə açan fakültə dekanı, professor İbrahim Kazımbəyli bildirib ki, Azərbaycanda rəqəmsal inkişaf siyasəti dövlət səviyyəsində prioritet istiqamətlərdən biridir. O qeyd edib ki, bu sahədə əsas strateji sənəd olan “Azərbaycan Respublikasında Rəqəmsal İnkişaf Konsepsiyası” Azərbaycan Respublikası Prezidentinin 16 yanvar 2025-ci il tarixli fərmanı ilə təsdiq olunub. Dekan vurğulayıb ki, rəqəmsal inkişaf strategiyası ölkənin dayanıqlı iqtisadi artımının təmin edilməsində və innovativ cəmiyyətin formalaşmasında mühüm rol oynayır. Eyni zamanda, informasiya texnologiyalarının sürətli inkişafının dövlət idarəçiliyinin səmərəliliyini artırdığını və vətəndaşlara göstərilən xidmətlərin keyfiyyətinin yüksəldilməsinə geniş imkanlar yaratdığını diqqətə çatdırıb.
Daha sonra İnformasiya texnologiyaları kafedrasının dosenti Aytəkin İsmayılova “Rəqəmsal texnologiyaların dövlət idarəçiliyi və təhsil sistemində tətbiqi” mövzusunda çıxış edərək bu sahədə müasir yanaşmaların və innovativ həllərin əhəmiyyətindən bəhs edib. O bildirib ki, rəqəmsal transformasiyanın idarəetmə və təhsil mühitinə təsiri, eləcə də gələcək inkişaf perspektivləri dövlətin daim diqqət mərkəzindədir.
İnformasiya texnologiyaları kafedrasının müəllimi Lalə Qurbanova isə “Böyük verilənlər (Big Data) və onun qərarvermə prosesində rolu” mövzusunda çıxış edərək qeyd edib ki, böyük verilənlərin təhlili müxtəlif sahələrdə daha dəqiq və əsaslandırılmış qərarların qəbuluna şərait yaradır. Onun sözlərinə görə, Big Data texnologiyalarından səmərəli istifadə təşkilatların rəqabət qabiliyyətini artırır və strateji planlaşdırmada mühüm rol oynayır.
Sonda mövzu ətrafında müzakirələr aparılıb.
