Aprelin 9-da Azərbaycan Dillər Universitetində (ADU) Türk Dünyası Araşdırmaları Mərkəzinin təşkilatçılığı ilə universitetin rektoru, akademik Kamal Abdullanın Yunus Əmrə İnstitutunun Azərbaycan üzrə koordinatoru Gökhan Seyhanla görüşü keçirilib.
“Tehsil365” xəbər verir ki, görüş zamanı tərəflər arasında qarşılıqlı əməkdaşlığın genişləndirilməsi, eləcə də birgə layihələrin həyata keçirilməsi məsələləri müzakirə olunub. Bildirilib ki, nəzərdə tutulan layihələrin əsas məqsədi türk xalqlarının milli-mənəvi dəyərlərini, zəngin mədəni irsini və ortaq kimliyini gənc nəslə çatdırmaqdır.
Müzakirələr çərçivəsində Türk Dünyası Mədəniyyət Günlərinin təşkili məsələsi xüsusi diqqət mərkəzində olub. Qeyd edilib ki, sözügedən tədbirin Azərbaycan Dillər Universitetində keçirilməsi planlaşdırılır.
Görüş zamanı rektor Kamal Abdulla “Dədə Qorqud və qeyri-səlis məntiq” kitabını Gökhan Seyhana təqdim edib. Öz növbəsində Gökhan Seyhan tərəfindən Çingiz Aytmatovun əsəri Kamal Abdullaya hədiyyə olunub.
Sonda tərəflər gələcək əməkdaşlığın inkişaf etdirilməsi və birgə layihələrin davamlı şəkildə həyata keçirilməsi istiqamətində razılığa gəliblər.
