"Cəmiyyətin inkişafı təsadüfi proses deyil — o, düşünülmüş strategiya və sağlam təməl üzərində qurulmalıdır. Bu təməlin adı isə təhsildir".
Bu fikirləri "Tehsil365" ə açıqlamasında təhsil eksperti Əli Ələkbərov bildirib.
O deyib ki, təhsilsiz cəmiyyət bünövrəsiz ev kimidir:
"Təhsilsiz cəmiyyət zahirən mövcud ola bilər, lakin onun davamlılığı və dayanıqlılığı ciddi sual altındadır. Necə ki, bünövrəsi olmayan ev ilk sarsıntıda uçur, eləcə də təhsildən məhrum olan cəmiyyət də ən kiçik sosial, iqtisadi və ya siyasi təzyiq qarşısında dağılmağa məhkumdur".
Ekspert qeyd edib ki, son zamanlarda uşaqların əsasəndə qızların təhsildən yayındırılması halları müşahidə olunur:
"Təəssüf doğuran hallardan biri də odur ki, Azərbaycanın bəzi bölgələrində bu gün də uşaqların, xüsusilə qızların təhsildən yayındırılması halları müşahidə olunur. Erkən nikahlar, sosial stereotiplər və yanlış düşüncə tərzi bir çox qız uşağının məktəbdən uzaq düşməsinə səbəb olur. Bu isə təkcə fərdi talelərin deyil, bütövlükdə cəmiyyətin gələcəyinin zədələnməsi deməkdir.”
“Azərbaycan Respublikasının Konstitusiyasının 42-ci maddəsinə əsasən hər bir vətəndaşın təhsil almaq hüququ vardır və dövlət bu hüququ təmin edir. Bundan əlavə, “Təhsil haqqında” Qanunun 5-ci maddəsində göstərilir ki, təhsil almaq hər bir vətəndaşın ayrılmaz hüququdur və bu hüquq dövlət tərəfindən qorunur.”
“Eyni zamanda, Azərbaycan Respublikasının İnzibati Xətalar Məcəlləsinin 51-ci maddəsinə əsasən valideynlərin və ya digər qanuni nümayəndələrin uşaqların ümumi orta təhsildən yayınmasına yol verməsi inzibati məsuliyyət yaradır və cərimə ilə nəticələnə bilər.”
“Bu baxımdan, övladlarını təhsildən yayındıran hər bir valideyn məsuliyyətə cəlb olunmalıdır. Çünki bu, yalnız ailədaxili məsələ deyil — bu, cəmiyyətin gələcəyinə qarşı edilən ciddi laqeydlikdir".
Ekspertin sözlərinə görə, müasir dünyada güc yalnız resurslarla ölçülmür, əsl güc savad və bilikdədir:
"Müasir dünyada güc artıq yalnız resurslarla ölçülmür. Əsl güc bilikdə, analitik düşüncədə və insan kapitalındadır. Təhsil isə bu gücün formalaşdığı əsas platformadır.”
“Təhsil yalnız diplom deyil — o, düşünməyi öyrədir, fərdi şəxsiyyət formalaşdırır və cəmiyyətin intellektual səviyyəsini yüksəldir. Bu səbəbdən təhsilə edilən hər bir investisiya, əslində, dövlətin gələcəyinə qoyulan ən strateji sərmayədir.”
“Hesab edirəm ki, güclü və dayanıqlı cəmiyyət qurmaq istəyiriksə, ilk növbədə onun təməlini — yəni təhsil sistemini möhkəmləndirməliyik. Çünki bünövrə nə qədər sağlam olarsa, qurulan gələcək də bir o qədər möhkəm olacaqdır".