Qarabağ Universitetində Azərbaycan Respublikası Minatəmizləmə Agentliyinin (ANAMA) nümayəndələri və ANAMA yanında İctimai Şuranın üzvləri universitetdə təhsil alan tələbələrlə görüş keçiriblər.
“Tehsil365“ xəbər verir ki, ANAMA-dan verilən məlumata görə, görüşün əsas məqsədi tələbələrin mina təhlükəsi barədə məlumatlandırılması, onların maarifləndirilməsi, ictimai fəaliyyətlərə daha fəal şəkildə cəlb olunması, eləcə də bu sahədə könüllü təşəbbüslərdə iştirakının artırılması və sosial məsuliyyət hissinin gücləndirilməsidir.
Tədbir ANAMA yanında İctimai Şuranın fəaliyyət planına uyğun olaraq keçirilib.
Görüşdə ANAMA-nın nümayəndələri tərəfindən mina təhlükəsinin yaratdığı risklər, azad olunmuş ərazilərdə mövcud vəziyyət və təhlükəsizlik qaydaları barədə geniş məlumat verilib. Bildirilib ki, mina təhlükəsi hələ də region üçün ciddi problem olaraq qalır və bu sahədə maarifləndirmə işlərinin aparılması mühüm əhəmiyyət daşıyır. Mina və digər partlayıcı sursatların nümunələri nümayiş olunaraq müəllim və tələbə heyətinə müfəssəl məlumat verilib.
İctimai Şuranın üzvləri çıxışlarında gənclərin həmin prosesdə rolunu xüsusi vurğulayıb, onların cəmiyyətin təhlükəsizliyinin təmin olunmasında fəal iştirakının vacibliyini qeyd ediblər. Tələbələrə mina təhlükəsi ilə bağlı düzgün davranış qaydaları və əldə etdikləri məlumatların öz yaxınları, həmyaşıdları ilə paylaşmalarının zəruriliyi diqqətə çatdırılıb.
Görüş çərçivəsində Qarabağ Universitetinin könüllüləri arasından mina təhlükəsi ilə bağlı maarifləndirmə sahəsində əməkdaşlıq etmək üçün 50 nəfər tələbə seçilib. Gələcəkdə də bu sahədə universitet tələbələri ilə əməkdaşlığın davam etdirilməsi nəzərdə tutulur.
Tədbir interaktiv formatda davam edib, tələbələri maraqlandıran suallar cavablandırılıb və mövzu ətrafında fikir mübadiləsi aparılıb.