İstanbulda Almaniyada yaşayan azərbaycanlı müğənni, bəstəkar və çoxalətli ifaçı (multiinstrumentalist) Seyran İsmayılxanovun “Ocean in the Desert” adlı konserti olub.
“Tehsil365” xəbər verir ki, Azərbaycanda 2026-cı ilin “Şəhərsalma və Memarlıq İli” elan edilməsinə həsr olunan konsert “Xarıbülbül” Azərbaycan Mədəniyyət Birliyinin təşkilatçılığı, Türkiyə-Azərbaycan Dərnəkləri Federasiyasının (TADEF) dəstəyi ilə baş tutub.
Konsertdən əvvəl Azərbaycanın tarixi yerlərini özündə əks etdirən videoçarx nümayiş olunub.
Proqramın rəsmi hissəsində çıxış edən TADEF-in mətbuat katibi, İstanbul Türkiyə-Azərbaycan Həmrəylik və Mədəniyyət Dərnəyinin (İSTAD) sədri Səfər Qaraqoyunlu, eləcə də “Xarıbülbül” Azərbaycan Mədəniyyət Birliyinin və Cəfər Cabbarlı adına Türkiyə-Azərbaycan Teatrının rəhbəri Kamalə Kamal Cabbarova Azərbaycan memarlığının özünəməxsus xüsusiyyətləri, işğal dövründə tarixi mirasımıza vurulan zərər, hazırda işğaldan azad edilən ərazilərimizdə mədəni irsimizin yenidən qurulması və Azərbaycan mədəniyyətinin dünyada təmsil edilməsi baxımından bu kimi tədbirlərin əhəmiyyəti barədə danışıblar.
Sonra çıxış edən Türk Dünyası Qadınları Platforumunun başçısı Günay Əliyeva tədbirin təşkilində əməyi keçən hər kəsə təşəkkürünü bildirib, Türk dünyasına göstərdiyi xidmətlərə görə Kamalə Kamal Cabbarovaya xüsusi hədiyyə təqdim edib.
Proqram bədii hissə ilə davam edib.
Konsertdə Seyran İsmayılxanovun bəstələri ilə yanaşı, Azərbaycan xalq musiqilərindən ibarət repertuarı beş dildə təqdim olunub. Tədbirdə Seyran İsmayılxanovla yanaşı, Azərbaycanı Türkiyədə təmsil edən gözəl səslərdən biri, “Xarıbülbül” Azərbaycan Mədəniyyət Birliyinin musiqi bölməsinin rəhbəri, müğənni-aktrisa Vüsalə Əsgərova, ifaçı və xoreoqraf Derya Kaptan və kaman ifaçısı Anar Yusub çıxış ediblər.
Seyran İsmayılxanov Azərbaycandan uzaqda yaşamasına baxmayaraq daima öz tarixinə, mədəniyyətinə bağlı olduğunu, Azərbaycan mədəniyyətini dünyada tanıtmağı özünə borc bildiyini deyib.
Proqram Minə Bayrakerinin rejissorluğu ilə baş tutub. Konsertin səhnə tərtibatında “Dərviş” mis emalatxanasının dekorativ məhsullarından istifadə edilib.
Konsert tamaşaçılar tərəfindən gur alqışlarla qarşılanıb.