Cəfər Cabbarlı adına Azərbaycan Dövlət Teatr Muzeyində Azərbaycan Dövlət İqtisad Universiteti nəzdində fəaliyyət göstərən Azərbaycan Maliyyə-İqtisad Kollecinin birgə təşkilatçılığı ilə “İradənə sahib çıx!” adlı maarifləndirici tədbir keçirilib.
“Tehsil365" xəbər verir ki, tədbirdə muzeyin əməkdaşı Türkan Əliyeva bəşəriyyət üçün ciddi təhlükə mənbələrindən biri olan ağ ölüm və onun törətdiyi fəsadlar barədə məlumat verib. Tədbir çərçivəsində mövzuya həsr olunmuş videoçarx nümayiş etdirilib.
Daha sonra Respublika Narkoloji Mərkəzinin həkim-narkoloqu Asif Kəngərli narkomaniyaya qarşı mübarizə və maarifləndirmə mövzusunda geniş mühazirə ilə çıxış edib. O, gənclərin zərərli vərdişlərdən uzaq durmasının vacibliyini vurğulayaraq sağlam həyat tərzinin əhəmiyyətindən danışıb, iştirakçıların suallarını cavablandırıb və mövzu ətrafında müzakirələr aparıb.
Həmçinin Asif Kəngərli bu sahədə apardığı tədqiqatları və maarifləndirici fəaliyyətini əks etdirən kitablarını təqdim edib.
Sonda tədbirin təşkilinə və əməkdaşlığa görə Asif Kəngərli muzeyin rəhbərliyinə və kollektivinə təşəkkürünü bildirib.