“Azərbaycanda 30 ildən artıq fəaliyyət göstəririk və fəaliyyətimiz dövründə çalışmışıq ki, ölkənin neft-qaz layihələri ilə yanaşı, sosial həyatında da iştirak edək. Ölkənin sosial həyatının müxtəlif istiqamətlərində, o cümlədən təhsil sahəsində müəyyən sosial layihələr həyata keçirməyə çalışırıq. Çox şadıq ki, sosial layihələrin coğrafiyası Azərbaycanın qədim diyarı olan Naxçıvan Muxtar Respublikasını da əhatə edir və artıq burada da layihələrimizi həyata keçirməyə başlayırıq”.
“Tehsil365“ xəbər verir ki, bunu jurnalistlərə açıqlamasında bp-nin Xəzər regionu üzrə vitse-prezidenti Bəxtiyar Aslanbəyli deyib.
O bildirib ki, bu gün Naxçıvan Muxtar Respublikasında Təhsil Nazirliyi ilə imzalanan müqavilə təhsil sahəsində bir neçə istiqamətdə sosial layihələrin həyata keçirilməsinin əsasını qoyur: “Ümid edirik ki, bu layihələr davamlı olacaq və bu gün əsasını qoyduğumuz əməkdaşlıq gələcək illərdə daha geniş miqyaslı və daha davamlı olacaq.
İmzalanan müqavilə çərçivəsində ilkin olaraq Naxçıvan Muxtar Respublikasında ingilis dili müəllimlərinin peşə keyfiyyətlərinin artırılması istiqamətində layihələr həyata keçiriləcək. “British Council” tərəfindən ingilis dili dərsləri təşkil olunacaq və nəticə etibarilə müəllimlərimizin beynəlxalq sertifikasiyası təmin ediləcək ki, bu da onların tədris keyfiyyətinin artmasına töhfə verəcək. Peşə təhsili müəssisələrində və liseylərdə iki emalatxana və iki laboratoriyanın qurulması da müqavilə çərçivəsində həyata keçiriləcək. Bu emalatxanalar və kimya laboratoriyaları həm şagirdlərin, həm də peşə təhsili müəssisələrində təhsil alan gənclərin bilik və bacarıqlarının artırılmasına xidmət edəcəkdir”.
Bəxtiyar Aslanbəyli qeyd edib ki, layihənin bir istiqaməti də Naxçıvan Muxtar Respublikasında təhsil alan istedadlı şagirdlərin dünya olimpiadalarına hazırlanmasıdır: “Şagirdlərin beynəlxalq olimpiadalara hazırlanması üçün xüsusi müəllimlər Muxtar Respublikaya cəlb olunacaq. Bu müəllimlər Azərbaycanın digər bölgələrində, o cümlədən paytaxtda şagirdləri beynəlxalq olimpiadalara hazırlayan yerli mütəxəssislər olacaq. Onlar üçün xüsusi iş qrafiki müəyyən ediləcək və şagirdlərin hazırlıq prosesi ilboyu davam etdiriləcək. Əsas məqsəd odur ki, ölkəmizi beynəlxalq olimpiadalarda təmsil edən şagirdlər arasında Muxtar Respublikanın şagirdləri də yer alsın”.