Bakı Mühəndislik Universitetinin (BMU) İnformasiya və kompüter texnologiyaları fakültəsinin dekanı, texnika elmləri doktoru, professor Vaqif Qasımov Belarus Respublikasının Minsk şəhərində keçirilən “İnformasiyanın qorunmasının texniki vasitələri” mövzusunda beynəlxalq elmi-texniki konfransın plenar iclasında məruzə ilə çıxış edib.
“Tehsil365" xəbər verir ki nüfuzlu beynəlxalq tədbir Belarus Dövlət İnformatika və Radioelektronika Universiteti, Belarus Respublikası Prezidenti yanında Əməliyyat və Analitik Mərkəz və Texniki Qoruma Vasitələri Elmi-Tədqiqat İnstitutu tərəfindən birgə təşkil olunub. Konfransda müxtəlif ölkələrdən alimlər, mütəxəssislər və sahə üzrə ekspertlər informasiya təhlükəsizliyi sahəsində aktual problemləri və yeni yanaşmaları müzakirə ediblər.
Professor Vaqif Qasımovun “Süni intellekt və kibertəhlükəsizliyin sinerjisi” mövzusuna həsr olunmuş plenar məruzəsində süni intellekt və kibertəhlükəsizlik sahələri arasındakı qarşılıqlı əlaqələr geniş şəkildə təhlil olunub. Məruzədə kibertəhlükəsizliyin təmin edilməsində süni intellekt texnologiyalarının rolu, kibertəhdidlərin aşkarlanması və qarşısının alınmasında yeni yanaşmalar, eləcə də süni intellekt sistemlərinin özündə mövcud olan təhlükəsizlik problemləri, məlumatların qorunması, etik və hüquqi çərçivələr kimi mühüm məsələlərə toxunulub.
Məruzə konfrans iştirakçıları tərəfindən böyük maraqla qarşılanıb, mövzu ilə bağlı ünvanlanan suallar ətraflı cavablandırılıb. Tədbir çərçivəsində müxtəlif ölkələrdən olan alimlər arasında fikir mübadiləsi aparılıb, gələcək əməkdaşlıq imkanları nəzərdən keçirilib.
Sonda professor Vaqif Qasımov konfrans çərçivəsində təqdim etdiyi məruzəyə görə təşkilatçılar tərəfindən təşəkkürnamə ilə təltif olunub.