Onun sözlərinə görə, insan bioloji və psixoloji olaraq sosial varlıqdır və rifahı digər insanlarla əlaqə və dəstək üzərində qurulub. “Əslində hər şeyin öhdəsindən tək gəlmək güclülük deyil, bəzən də emosiyalarını paylaşmaqdan çəkinməkdir. Uzunmüddətli stress hallarında sosial dəstəyin olmaması depressiya, təşviş və özünə inamın azalması riskini artırır. Kömək istəmək bacarığı isə insanın özünü tanıdığını və çətinlik yaşadığını dərk etdiyini göstərir.”
Xəzər Universitetinin Psixologiya Departamentinin əməkdaşı, psixoloq Mirsadiq Muxtarov “Tehsil365”ə açıqlamasında bildirib: “Uzun illərdir güclü insan anlayışı daha çox dözümlülük, çətinliklərlə təkbaşına mübarizə aparmaq kimi xüsusiyyətlərlə əlaqələndirilir. Xüsusilə bizim cəmiyyətlərdə belə bir inanc formalaşıb ki, insan nə qədər az kömək istəyirsə və nə qədər çox yükü tək daşıyırsa, o bir qədər güclü sayılır. Halbuki psixoloji baxımdan bu yanaşma birtərəfli və bəzən zərərli bir düşüncədir.”
Muxtarov qeyd edib ki, kömək istəməyə mane olan əsas faktorlardan biri sosial stereotiplərdir. “Uşaqlıqdan insanlara güclü olmağın ağlamamaq, hisslərini göstərməmək və problemləri tək həll etmək olduğu öyrədilir. Xüsusilə kişilərdə bu daha qabarıq müşahidə olunur. Nəticədə kömək istəmək zəiflik kimi qəbul edilir. Halbuki bu, həm münasibətlərə, həm də psixoloji sağlamlığa mənfi təsir göstərir.”
Psixoloq əlavə edib ki, utanc və başqalarının qiymətləndirmə qorxusu da insanları dəstək istəməkdən çəkindirir. “İnsanlar bəzən başqalarının onları zəif və bacarıqsız hesab edəcəyindən ehtiyat edirlər. Halbuki real münasibətlərdə səmimiyyət və açıq ünsiyyət daha sağlam bağların qurulmasına şərait yaradır.”
Nəticə olaraq, Mirsadiq Muxtarov vurğulayıb: “Psixoloji elastiklik insanın dəyişən şəraitə uyğunlaşmasına kömək edir. Kömək istəmək isə alternativ yolları görmək və qəbul etmək bacarığının bir hissəsidir. Əsl güclü insan hər şeyi tək etməyə çalışan deyil, ehtiyac duyduğu anda dəstək almağı bacaran insandır.”