Lalələr yazın gözəlliyindən soraq verən və göz oxşayan güllərdən biridir. Könüllərə xoş duyğular gətirən bu gözəl gülləri təbiətin oyanışının, baharın rəngarəngliyinin və həyatın füsunkarlığının rəmzi kimi qəbul edirlər.
Qızıl laləni nəyə bənzətməyiblər? Qızıl bayrağa, həyalı qız yanağına, gözəl bir xanımın başına örtdüyü qırmızı yaylığa, od vurulmuş zəmiyə... Hansı gözlə baxırsan, bax, bütün hallarda laləli düz duyğuları cuşa gətirən füsunkar bir mənzərədir.
Üçüncü ildir ki, Dənizkənarı Milli Park ərazisi yazın bu günləri özünün ən xoş çağlarını yaşayır. Müxtəlif rəngdə açan lalələr Xəzər sahilini rəngli bir xalçaya bürüyüb. Yol kənarlarında və çəmənliklərdə bitən al qırmızı, sarı, ağ və bənövşəyi rəngli güllər həmin əraziyə özgə bir görkəm verir. Dənizdən əsən zərif meh vurduqca al-əlvan güllər sahil boyu yellənərək bu yerlərin gözəlliyinə başqa bir təravət gətirir.
Paytaxtın əsas istirahət məkanlarından biri olan parkda əkilən dağ lalələri və aparılan yaşıllaşdırma işləri əraziyə füsunkar və baxımlı görkəm verib. Parkın müxtəlif hissələrində salınan həmin güllər ümumi landşaftın ayrılmaz hissəsinə çevrilib. Rəngbərəng lalələr zolağı ziyarətçi və turistlərin ən çox üz tutduğu məkanlardan biridir.
Bu il bulvar ərazisində 8 rəngdə 80 mindən artıq lalə əkilib. Rəngbərəng dağ lalələri bulvarın estetik görüşünə, görkəminə gözəllik qatmaqla bərabər yaşıllıq balansının qorunmasına da səbəb olur. Burada rəngli fonda şəkil çəkdirən, fotosessiya edənlər də var, güllərin dəniz mənzərəsi ilə yaranan harmoniyadan zövq alanlar da.
Hər nəyə bənzəyir-bənzəsin, al-əlvan lalələrin sərgi açdığı Dənizkənarı bulvar bir gözəllik dünyasıdır. Bu gözəlliyi görməyə, sevməyə və duyğulanmağa dəyər...