Şamaxıda Azərbaycan Minimal İnvaziv Cərrahlar Cəmiyyətinin təşkilatçılığı ilə 12-ci Regional Konfrans öz işinə başlayıb. Tədbir TƏBİB, Azərbaycan Minimal İnvaziv Cərrahlar Cəmiyyəti və Şamaxı Rayon Mərkəzi Xəstəxanasının birgə təşkilatçılığı ilə keçirilir.
“Tehsil365" xəbər verir ki, konfransda TƏBİB-in Təlim və tədqiqatlar departamentinin rəhbəri Teymur Mirzabəyli, Şamaxı Rayon İcra Hakimiyyəti başçısının müavini – Ərazi-təşkilat və ictimai-siyasi məsələlər şöbəsinin müdiri Mehriban Eyyubova, Azərbaycan Minimal İnvaziv Cərrahlar Cəmiyyətinin prezidenti, professor Qurbanxan Müslümov, Şamaxı Rayon Mərkəzi Xəstəxanasının direktoru Natiq Əliyev, Qobustan Rayon Mərkəzi Xəstəxanasının direktoru Günay Muradova, eləcə də müxtəlif regionlardan, xüsusilə Dağlıq Şirvan iqtisadi rayonunu təmsil edən həkim-mütəxəssislər iştirak ediblər.
Konfrans çərçivəsində canlı cərrahiyyə nümayiş olunub. Əməliyyat professor Qurbanxan Müslümov və Şamaxı Rayon Mərkəzi Xəstəxanasının direktorunun cərrahi işlər üzrə müavini Vüsal Sədrayev tərəfindən icra edilib. Canlı cərrahiyyə zamanı iki pasiyent üzərində daşlı xolesistit diaqnozu ilə laparoskopik xolesistektomiya əməliyyatı uğurla həyata keçirilib.
Tədbirin elmi proqramına uyğun olaraq cərrahiyyədə qanaxmaların idarə olunması, endoskopik və minimal invaziv yanaşmalar, postoperasion ağırlaşmaların idarəsi, invaziv radiologiyanın rolu və digər aktual mövzular üzrə plenar iclaslar və panel müzakirələr təşkil edilib.
Şamaxı Rayon Mərkəzi Xəstəxanasının direktoru Natiq Əliyev jurnalistlərə açıqlamasında bildirib ki, bu gün Şamaxıda keçirilən konfrans region üçün xüsusi əhəmiyyət daşıyır. Onun sözlərinə görə, Dağlıq Şirvan bölgəsində fəaliyyət göstərən həkimlər üçün bu cür tədbirlər yeni biliklərin, müasir yanaşmaların və tibbi protokolların öyrənilməsi baxımından olduqca vacibdir.
Direktor qeyd edib ki, professor və müəllim heyəti tərəfindən təqdim olunan yeniliklər iştirakçı həkimlərin peşəkar inkişafına mühüm töhfə verir. O, bu kimi konfransların regionlarda keçirilməsini ölkədə həyata keçirilən səhiyyə siyasətinin uğurlu nəticəsi kimi qiymətləndirib. Bildirib ki, bu tədbirlər regionlarda səhiyyə xidmətlərinin keyfiyyətinin artırılmasına, müasir tibbi xidmətin davamlı şəkildə təşkilinə və əhalinin daha əlçatan tibbi xidmətlə təmin olunmasına mühüm töhfə verir.
Azərbaycan Minimal İnvaziv Cərrahlar Cəmiyyətinin prezidenti, professor Qurbanxan Müslümov isə konfransın əsas məqsədinin minimal invaziv cərrahiyyədə aktual problemlərdən biri hesab olunan qanaxmalara multidisiplinar yanaşmanın müzakirəsi olduğunu bildirib.
Onun sözlərinə görə, bu mühüm məsələnin müzakirəsi üçün Bakıdan ölkənin aparıcı klinikalarını təmsil edən 20-yə yaxın mütəxəssis Şamaxıya gəlib. Eyni zamanda, Şamaxı və ətraf rayonlarda fəaliyyət göstərən 200-ə yaxın həkim konfransda iştirak etmək üçün qeydiyyatdan keçib.
Professor vurğulayıb ki, konfrans çərçivəsində aktual məsələlər, dünyada tətbiq olunan müasir standartlar və bu sahədə mövcud yeniliklər müzakirə olunacaq. Məqsəd dünya təcrübəsindən yararlanaraq ölkədə minimal invaziv cərrahiyyənin inkişafına töhfə vermək və əhaliyə göstərilən tibbi xidmətin keyfiyyətini daha da yüksəltməkdir. O, həmçinin tədbirin sonunda panel diskussiyaların keçiriləcəyini və region həkimlərinin də bu müzakirələrdə fəal iştirak edəcəyini diqqətə çatdırıb.
Konfransın ikinci günündə Şamaxı Rayon Mərkəzi Xəstəxanasında praktiki təlimlərin keçirilməsi nəzərdə tutulub. Təlimlər çərçivəsində lazer proktologiya, cərrahi tikiş, histeroskopiya, anestezioloq-reanimatoloqlar üçün CPR, traxeostomiya, endoskopiya, eləcə də tibb bacıları üçün praktiki bacarıqlar üzrə sessiyalar təşkil olunacaq. Bu təlimlərin iştirakçıların praktiki bilik və bacarıqlarının artırılmasına mühüm töhfə verəcəyi bildirilib.
İki gün davam edəcək konfrans regionlarda minimal invaziv cərrahiyyənin inkişafı, müasir tibbi texnologiyaların tətbiqi, həkimlər arasında bilik və təcrübə mübadiləsinin gücləndirilməsi baxımından mühüm platforma kimi qiymətləndirilir.