Bakı şəhərində görkəmli musiqiçi, pedaqoq və Azərbaycan arfa ifaçılığı məktəbinin yaradıcısı Aida Abdullayevanın xatirəsi yad edildi.
“Tehsil365” xəbər verir ki, 13 aprel 1922-ci ildə Bakıda anadan olan sənətkar milli musiqi mədəniyyətinin inkişafında mühüm rol oynayıb.
Aida Abdullayeva uzun illər Bakı Musiqi Akademiyasında professor kimi fəaliyyət göstərərək yüzlərlə tələbənin yetişməsinə töhfə verib. Onun pedaqoji fəaliyyəti nəticəsində Azərbaycanda arfa ifaçılığı yeni mərhələyə qədəm qoyub və milli ifaçılıq ənənələri formalaşıb.
1972-ci ildə Azərbaycan SSR-in əməkdar artisti fəxri adına layiq görülən sənətkar həm ifaçı, həm də müəllim kimi böyük nüfuz qazanıb. Onun yetişdirdiyi musiqiçilər bu gün də ölkənin və dünyanın müxtəlif səhnələrində çıxış edərək müəllimlərinin irsini yaşadırlar.
11 aprel 2009-cu ildə Bakıda vəfat edən Aida Abdullayeva Azərbaycan musiqi tarixində silinməz iz qoyub. Onun fəaliyyəti və yaradıcılığı bu gün də gənc musiqiçilər üçün örnək olaraq qalır.