Tibb təhsilinin insan xarakterinə təsiri məsələsi birmənalı deyil. Bu daha çox insanın əvvəlcədən formalaşmış xüsusiyyətləri ilə seçdiyi peşə arasındakı uyğunluqla bağlıdır.
Bu sözləri “Tehsil365” ə açıqlamasında , tibb eksperti Rasif Bağırov bildirib.
“Bilirsiniz ki ,tibb təhsilinin insanın xarakterinə təsir etməsi anlayışı bir qədər nisbi məsələdir. Çünki insanlar adətən sənət seçərkən artıq həmin sahəyə uyğun müəyyən xarakter xüsusiyyətlərinə sahib olurlar. Yəni insanın dünyagörüşü, yanaşma tərzi və davranışları çox vaxt seçdiyi peşə ilə üst-üstə düşür. Bu baxımdan demək olar ki, peşə insanı formalaşdırmaqdan çox, insan öz xarakterinə uyğun peşəni seçir.”
“Məsələn, aktyorluq fakültəsini seçən biri çox vaxt davranışlarında, ünsiyyətində və ümumi hərəkətlərində daha emosional və ifadəli olur. Eyni zamanda, dəqiq elmlərlə məşğul olan insanlar daha analitik, daha sistemli düşüncə tərzi ilə seçilirlər. Bu fərqlər artıq onların daxilində mövcud olan xüsusiyyətlərin bir əksidir.”
“Tibb sahəsinə gəldikdə isə, burada da oxşar bir vəziyyət müşahidə olunur. Yəni tibb təhsili alan insanların xarakterində tamamilə fərqli, kəskin şəkildə nəzərə çarpan dəyişikliklər yaratdığını demək çətindir. Açığı, belə bir prosesi açıq şəkildə müşahidə etmək olmur. Amma yenə də qeyd etmək lazımdır ki, insan bu sahəyə daha dərindən daxil olduqca, müəyyən incə fərqlər ortaya çıxır. Bu fərqlər daha çox yanaşma tərzində, məsuliyyət hissində və insanlara baxış bucağında özünü göstərir.”
“Yekun olaraq, demək olar ki, tibb təhsili insanı kökündən dəyişmir, lakin onun mövcud xarakter xüsusiyyətlərini müəyyən istiqamətdə inkişaf etdirə bilir.”