“İmtahan suallarının çətinliyi ilə bağlı narazılıqlar əsasən repetitorları və hazırlıq kursu müəllimlərini narahat edir. Valideynlər yüksək nəticə gözləsə də, bəzi hallarda bu nəticələr özünü doğrultmur. Buna görə də imtahanların sadələşdiriləcəyi ilə bağlı fikirlər səslənir, lakin mən bunu real hesab etmirəm.”
Bu sözləri “Tehsil365”ə açıqlamasında təhsil eksperti Məzahir Məmmədli bildirib.
Ekspert bildirib ki, imtahan sualları artıq əvvəlcədən hazırlanır və test bazasına yerləşdirilir. Onun sözlərinə görə, bu mərhələdən sonra imtahan ərəfəsində hər hansı dəyişiklik etmək real görünmür.
Məzahir Məmmədli qeyd edib ki, növbəti illərdə müəyyən dəyişikliklər mümkün olsa da, cari imtahanlar üçün sadələşdirilmiş variantın tətbiqi gözlənilmir. O vurğulayıb ki, test bankı artıq təsdiq olunduğu üçün imtahan modelində son anda dəyişiklik ehtimalı çox aşağıdır.