Təhsil və sağlamlıq bir-biri ilə ayrılmaz şəkildə bağlı olan sahələrdir. Bu barədə danışan tibb eksperti Adil Qeybulla bildirib ki, sağlam cəmiyyətin formalaşması məhz təhsil sistemindən başlayır.
Onun “Tehsil365”ə açıqlamasına görə, “sağlam bədəndə sağlam ruh olar” prinsipi yalnız fərdi yanaşma deyil, eyni zamanda dövlət siyasətinin də əsas istiqamətlərindən biri olmalıdır:
“Şagird və tələbələrin fiziki və psixoloji sağlamlığı təhsil prosesinin ayrılmaz hissəsi kimi nəzərə alınmalıdır. Təhsil yalnız bilik verməklə məhdudlaşmamalı, eyni zamanda sağlam həyat tərzini formalaşdırmalıdır.”
Ekspert vurğulayıb ki, bu gün bir çox təhsil müəssisələrində sağlamlıqla bağlı infrastruktur yetərli səviyyədə deyil:
“Təəssüf ki, məktəblərdən ali təhsil müəssisələrinə qədər bir çox yerlərdə tibbi xidmətlər sistemli şəkildə təşkil olunmayıb. Halbuki hər bir təhsil müəssisəsində tibbi nəzarət, profilaktik müayinələr və ilkin tibbi yardım üçün uyğun şərait yaradılmalıdır.”
Adil Qeybulla qeyd edib ki, inkişaf etmiş ölkələrdə bu sahə artıq təhsilin ayrılmaz komponentinə çevrilib və Azərbaycan da bu təcrübədən yararlanmalıdır:
“Dünya təcrübəsində məktəb və universitetlərdə tibbi xidmətlər, psixoloji dəstək və sağlamlıq monitorinqi sistemi geniş şəkildə tətbiq olunur. Biz də bu istiqamətdə addımlar atmalı, gənc nəslin sağlamlığını qorumağı prioritetə çevirməliyik.”
Ekspertin fikrincə, təhsil müəssisələrində sağlamlıq sisteminin gücləndirilməsi gələcəkdə həm cəmiyyətin inkişafına, həm də sağlam genofondun qorunmasına mühüm təsir göstərəcək.