Onun sözlərinə görə, müasir dövrdə bu təzyiq həm sosial mediada, həm də korporativ mühitdə özünü göstərir. “Sosial mediada insanlar daha çox ideal, xoşbəxt və uğurlu həyat obrazları ilə qarşılaşır. Bu, xüsusilə gənclərdə müqayisə, yetərsizlik hissi və daxili təzyiq yaradır. Digər tərəfdən, korporativ mühitdə daim məhsuldar, enerjili və ‘pozitiv’ görünmək gözləntisi insanın real emosiyalarını gizlətməsinə səbəb olur.”
Psixoloq Mətanət Əliyeva “Tehsil365”ə açıqlamasında bildirib: “Pozitiv düşüncə anlayışı özlüyündə faydalıdır, lakin onun məcburi və həddindən artıq formada təqdim olunması – yəni insanın hər vəziyyətdə özünü yaxşı hiss etməyə məcbur kimi göstərilməsi – psixoloji baxımdan əks təsir yarada bilər. Bu, emosiyaların inkarına, real hisslərin bastırılmasına və nəticədə emosional tükənmə ilə yanaşı maskalanmış depressiyanın yaranmasına şərait yaradır.”
Əliyeva vurğulayıb ki, problem “pozitiv düşüncə”nin özü deyil, onun reallıqdan uzaq, məcburi və balanssız şəkildə təqdim olunmasıdır. “Psixoloji sağlamlıq üçün bütün emosiyaların – həm müsbət, həm də mənfi hisslərin – qəbul olunması və işlənməsi vacibdir. Əks halda insan özünü daim yaxşı göstərməyə çalışsa da, daxilində boşluq və yorğunluq hissi formalaşır.”