“Valideynlik yalnız övladı böyütmək deyil, onu mənəvi cəhətdən qorumaq və doğru yola yönləndirməkdir. Uşaq Allahı qorxu ilə deyil, sevgi ilə tanımalıdır və bu prosesdə valideynin davranışı əsas rol oynayır.”
Bu sözləri Hacı Surxay Məmmədli "Tehsil365"ə açıqlamasında deyib.
O bildirib ki, Qurani-Kərimdə valideynlərin övladlarına qarşı məsuliyyəti xüsusi vurğulanır və dini tərbiyə bu məsuliyyətin əsas hissəsidir. Onun sözlərinə görə, uşaqlar daha çox valideynin davranışını nümunə götürür və bu baxımdan əməl tərbiyənin əsas vasitəsidir.
Hacı Surxay Məmmədli qeyd edib ki, dini tərbiyədə zorakılıq və məcburiyyət əks təsir yaradır, uşaqlara hər bir məsələ hikmətlə izah olunmalıdır. O vurğulayıb ki, dini tərbiyə yalnız ibadətlərin öyrədilməsi ilə məhdudlaşmır, eyni zamanda əxlaq, mərhəmət və məsuliyyət hissinin formalaşdırılmasını əhatə edir.