“Ölkəmizdə ictimai nəqliyyat sahəsində problemlər var və görüləsi işlər çoxdur. Metrostansiyaların sayı artırılmalı, avtobus şəbəkəsi daha geniş və əhatəli olmalıdır.”
Bu sözləri "Tehsil365"ə açıqlamasında nəqliyyat üzrə ekspert Ərşad Hüseynov bildirib.
Ekspert bildirib ki, inkişaf etmiş ölkələrlə müqayisədə metropoliten və ictimai nəqliyyat şəbəkəsi kifayət qədər geniş deyil. Onun sözlərinə görə, alternativ nəqliyyat vasitələrinin, o cümlədən tramvay xətlərinin inkişafı da vacibdir.
Ərşad Hüseynov qeyd edib ki, ictimai nəqliyyatda nağdsız ödəniş sisteminin tam tətbiqi mühüm məsələlərdəndir. O vurğulayıb ki, metropoliten və bəzi avtobuslarda bu sistem tətbiq olunsa da, bütün nəqliyyat vasitələrində bu proses yekunlaşdırılmalıdır. Bunun üçün avtobus parkının yenilənməsi və daha çevik ödəniş sistemlərinin qurulması vacibdir.
Ekspert əlavə edib ki, “TələbəPlus” kartlarının tətbiqi müsbət addımdır və bu kartlar vasitəsilə tələbələr üçün gələcəkdə daha geniş güzəştlər tətbiq etmək mümkündür. O, həmçinin ödəniş sistemlərinin rəqəmsallaşdırılmasının və mobil cihazlar üzərindən istifadənin genişləndirilməsinin vacibliyini vurğulayıb.