Günümüzdə ən çox müzakirə olunan mövzulardan biri süni intellektin yazıçılıq yaradıcılığına təsiridir. Bu məsələ tez-tez gündəmə gəlir və müxtəlif tədbirlərdə müzakirə olunur.
“Tehsil365”ə açıqlamasına görə, yazıçı Rövşən Abdullaoğlu bu barədə fikirlərini bölüşüb.
“Süni intellekt yazıçının yaradıcılığına təhdid edir, yoxsa fürsət? Günümüzdə ən çox müzakirə olunan suallardan biri və mənə demək olar ki, əksər tədbirlərdə bu sual verilir. Mən belə deyərdim ki, ümumiyyətlə, süni intellekt yazıçıya araşdırmasını sürətləndirir, ona imkan yaradır ki, əvvəllər bir ay və ya iki aya əldə etdiyi məlumatı artıq bir-iki saat içində əldə etsin. Bu baxımdan bu, fürsətdir.
Süni intellekt yazıçıların araşdırma və tədqiqat prosesini daha da sürətləndirir. Digər tərəfdən, yazıçılarda bəzən mövzu qıtlığı yarana bilər və bu zaman süni intellekt müxtəlif ideya və variantlar təqdim edərək onların təxəyyülünü genişləndirir. Yazıçının yaradıcılıq blokunu aradan qaldırmağa da kömək edə bilər.
Bəzən yaradıcılıq böhranı zamanı süni intellekt bir enerji mənbəyi kimi çıxış edir. Yeni ideyalar verir, hansı mövzulara toxunmaq lazım olduğunu göstərir və yazıçıya istiqamət verir. Bu baxımdan da o, yazıçının daha yaxşı yazmasına və yaratmasına imkan yaradır.
Ancaq bunun təhlükəli tərəfi də var. Yazıçının potensialını zəiflədə və onun bacarıqlarının passivləşməsinə səbəb ola bilər. Əgər yazıçı bütün işi süni intellektə həvalə etsə, tədricən öz düşünmə və yaradıcı bacarıqlarını itirə bilər. İstifadə olunmayan bacarıqlar zamanla zəifləyir.
Digər tərəfdən, süni intellekt eyni üslubların yayılmasına səbəb ola bilər. Nəticədə yazıçılar eyni qəliblərdən istifadə etməyə başlayar və kitablar bir-birinə bənzəyər. Bu isə ədəbiyyatda orijinallığın və fərqliliyin azalmasına gətirib çıxara bilər. Yazıçının öz üslubu, fərdi yanaşması və orijinallığı zəifləyə bilər.
Ona görə də süni intellekt həm fürsət, həm də təhlükədir. Onun təsiri ondan necə istifadə olunmasından asılıdır. Düzgün istifadə edilərsə, böyük bir imkan yaradır; yanlış və həddindən artıq asılılıq isə yaradıcılığı zəiflədə bilər.”