Göz xəstəliklərinin bir qismi uzun müddət heç bir əlamət vermədən inkişaf edir və yalnız gec mərhələdə ciddi görmə itkisi ilə özünü büruzə verir. Mütəxəssislər bildirir ki, bu cür “səssiz” gedişli xəstəliklər vaxtında aşkarlanmadıqda geri dönməz nəticələrə səbəb ola bilər.
“Tehsil365”ə açıqlamasına görə, Dr. Xaliq Əliyev qeyd edib ki, xüsusilə qlaukoma və diabetik göz fəsadları ən təhlükəli “səssiz” xəstəliklər sırasında yer alır.
Onun sözlərinə görə, əgər qazanılma (sonradan yaranan) göz xəstəlikləri nəzərə alınarsa, ilk növbədə qlaukoma diqqət çəkir. Bu xəstəlik erkən mərhələdə ağrı və ya görmə zəifliyi vermir, lakin tədricən yan (periferik) görmə sahəsini daraldır və gecikmiş hallarda korluğa qədər gedə bilər.
Eyni zamanda, şəkərli diabet fonunda inkişaf edən diabetik retinopatiya da uzun müddət simptomsuz keçə bilər və yalnız sonradan görmədə bulanıqlıq və ya qəfil zəifləmə ilə üzə çıxır.
Mütəxəssis əlavə edib ki, yaşa bağlı makula degenerasiyasının erkən mərhələləri də hiss olunmaya bilər. Bu zaman əsasən mərkəzi görmə tədricən zəifləyir və insan oxuma və incə detalları seçməkdə çətinlik çəkir.
Bəzi hallarda torlu qişa qopması da ilkin mərhələdə zəif əlamətlərlə başlayır. İşıq çaxmaları və “uçuşan nöqtələr” müşahidə oluna bilər, lakin vaxtında müdaxilə edilməzsə görmə itkisi baş verə bilər.
Bundan başqa, kataraktanın erkən mərhələsi də yavaş inkişaf etdiyi üçün uzun müddət hiss olunmaya bilər və görmə tədricən bulanıqlaşır.
Həmçinin yüksək qan təzyiqi fonunda yaranan hipertenziv retinopatiya çox vaxt simptomsuz keçir və yalnız göz müayinəsi zamanı təsadüfən aşkarlanır.