“Sosial media və gecə telefon istifadəsi psixoloji sağlamlığa mənfi təsir edir.”
Psixoloq Fəridə Musəvi “Tehsil365”ə müsahibəsində dövrlərdə ən çox rast gəlinən psixoloji problemlər, psixoloqa müraciət halları və sosial medianın insan psixologiyasına təsiri ilə bağlı suallarımızı cavablandırıb.
Hazırda insanlar arasında ən çox rast gəlinən psixoloji problem hansıdır?
— Ən çox rast gəlinən psixoloji problemlər depressiya, müxtəlif təşviş (həyəcan) pozuntuları, stress, panik atak, obsessiv-kompulsiv pozuntu və özünəinamsızlıqdır. Bu hallar emosional tarazlığı pozaraq gündəlik həyata, iş və şəxsi münasibətlərə mənfi təsir göstərir, bəzən isə psixosomatik problemlərə yol açır.Eyni zamanda qeyd etmək lazımdır ki, hər bir emosiyanın yaşanması normaldır. İnsan kədərlənə, sevinə, ağlaya bilər. Problem o zaman yaranır ki, bu vəziyyət uzun müddət davam edir. Məsələn, depressiv hallar qısa müddətli ola bilər və bu, fəsil dəyişiklikləri, ayrılıqlar və stresslə bağlı baş verə bilər. Lakin bu vəziyyət aylarla davam edirsə, artıq bu, ciddi siqnaldır və vaxtında müdaxilə olunmalıdır.
İnsanlar psixoloqa hansı hallarda müraciət etməlidir?
— İnsanlar gündəlik həyatlarında uzunmüddətli stress, narahatlıq, depressiv vəziyyət, panik atak və ya emosional nəzarətin çətinləşdiyi hallarda psixoloqa müraciət etməlidirlər. Əsas məsələ problemin böyüməsini gözləmədən vaxtında dəstək almaqdır. Erkən müdaxilə daha effektiv nəticə verir.
Sosial media psixoloji sağlamlığa necə təsir edir?
— Sosial media psixoloji sağlamlığa ciddi təsir göstərir. Xüsusilə gecə saatlarına qədər telefondan istifadə insanın sosial həyatdan uzaqlaşmasına və asosiallaşmasına səbəb olur. Bu isə ünsiyyət bacarıqlarını zəiflədir və davranışlara mənfi təsir edir.Eyni zamanda yuxu rejiminin pozulması sinir sistemi üçün zərərlidir. Gecə yuxusu çox vacibdir və onun pozulması həm psixoloji, həm də fiziki problemlərə yol aça bilər.