Sosial vəziyyət şagirdin təhsilinə yalnız maddi imkanlar baxımından deyil, həm də onun formalaşdığı mənəvi və intellektual mühit kontekstində ciddi təsir göstərir.
Təhsil eksperti Şəmsi Qoca “Tehsil365”ə açıqlamasında bildirib ki, ailənin sosial-iqtisadi səviyyəsi uşağın təhsilə çıxış imkanlarını müəyyən etməklə yanaşı, onun gündəlik həyat keyfiyyətini və təhsil prosesinə yanaşmasını da formalaşdırır.
Ekspertin sözlərinə görə, ailənin gəlir səviyyəsi uşağın keyfiyyətli dərs vəsaitlərinə, müasir texnologiyalara və əlavə təhsil imkanlarına çıxışını asanlaşdırır. Bu isə şagirdin yalnız dərslərinə fokuslanmasına və daha stabil təhsil mühiti əldə etməsinə şərait yaradır.
Şəmsi Qoca qeyd edib ki, maddi çətinlik yaşayan ailələrdə uşaqlar çox zaman erkən yaşlardan məişət və sosial problemlərlə üzləşir, bu isə onların akademik motivasiyasına və gələcəyə dair hədəflərinə mənfi təsir göstərə bilər.
Digər mühüm məqam isə “mədəni kapital” amilidir. Ekspertin fikrincə, təhsilli valideynlərə sahib olan uşaqlar məktəbə başlamazdan əvvəl belə daha geniş söz ehtiyatı, kitab oxuma vərdişi və sərbəst fikir ifadə etmə bacarığı qazanırlar. Belə mühitdə təhsil uşaqlar üçün məcburi proses deyil, həyat tərzi kimi formalaşır.
Nəticə etibarilə, sosial-iqtisadi imkanları daha yüksək olan şagirdlər çox vaxt məktəb həyatına daha hazırlıqlı başlayır və bu üstünlük zamanla onların akademik nəticələrinə, peşə seçimlərinə və ümumi sosial mövqelərinə təsir edir.