Müasir dövrdə təhsil sistemi yalnız bilik və bacarıqların ötürülməsi ilə məhdudlaşmır, eyni zamanda gənclərin mənəvi dünyasının formalaşmasında da mühüm rol oynayır. Qloballaşma və texnologiyanın təsiri altında böyüyən gənclərin dəyərlər sistemi isə bu mövzunu daha da aktualedir.
Mövzu ilə bağlı ilahiyyatçı Elşad Miri “Tehsil365"ə açıqlama verib.
İlahiyyatçı bildirib ki, “Müasir təhsil gənclərin intellektual inkişafına böyük töhfə versə də, mənəvi dəyərlərin aşılanması da paralel şəkildə həyata keçirilməlidir.”
Onun sözlərinə görə, “Əgər təhsil yalnız akademik biliklərlə məhdudlaşarsa, bu zaman gənclərdə mənəvi boşluq yarana bilər. Halbuki cəmiyyət üçün faydalı fərd yetişdirmək üçün etik və mənəvi prinsiplər də vacibdir.”
İlahiyyatçı vurğulayıb ki, təhsil sistemi gənclərə düzgün istiqamət verməlidir: “Gənclər aldıqları bilikləri yalnız şəxsi uğur üçün deyil, eyni zamanda cəmiyyətə və insanlara fayda vermək məqsədilə istifadə etməyi öyrənməlidirlər.”
O həmçinin qeyd edib ki, ailə və məktəb bu prosesdə birgə rol oynayır: “Mənəvi inkişaf yalnız məktəbdə deyil, ailədə verilən tərbiyə ilə tamamlanır. Bu iki faktor bir-birini tamamlamalıdır.”
Sonda ilahiyyatçı bildirib ki, “Müasir təhsil düzgün qurulduqda gənclərin həm savadlı, həm də yüksək mənəvi dəyərlərə sahib şəxsiyyət kimi formalaşmasına şərait yaradır.”