Müasir dövrdə təhsil prosesində rəqəmsal texnologiyalardan istifadə geniş yayılıb. Məktəblərdə planşet, kompüter və digər elektron cihazların istifadəsi uşaqların gündəlik həyatının ayrılmaz hissəsinə çevrilib. Lakin mütəxəssislər uzun müddətli ekran istifadəsinin görmə qabiliyyətinə mənfi təsir göstərə biləcəyini bildirirlər.
Mövzu ilə bağlı “Tehsil365"ə oftalmoloq Aynur Əliyeva açıqlama verib.
Həkim qeyd edib ki, qaranlıq şəraitdə ekran qarşısında vaxt keçirmək xüsusilə zərərlidir: “Qaranlıqda müxtəlif monitor texnikasına baxmaq həm gözə, həm də ümumi orqanizmə mənfi təsir edir. Ekranlara tam qaranlıqda deyil, ən azı yarımqaranlıq və ya işıqlı mühitdə baxmaq tövsiyə olunur.”
Onun sözlərinə görə, ekran qarşısında keçirilən vaxt da məhdudlaşdırılmalıdır: “Sutka ərzində 24 saatdan maksimum 4 saat monitor istifadəsinə icazə verilir. Daha uzun müddət istifadə göz yorğunluğu və quruluq yaradır.”
Oftalmoloq cihazlardan düzgün istifadə qaydalarına da diqqət çəkib: “Monitor gözdən bir qədər aşağı səviyyədə yerləşdirilməli və ən azı 30 sm məsafə saxlanılmalıdır. Bu, gözə düşən yükü azaldır.”
Aynur Əliyeva vurğulayıb ki, qaranlıq otaqda ekran istifadəsi daha ciddi problemlərə səbəb ola bilər: “İşıqsız mühitdə televizor və ya digər cihazlara baxmaq göz daxili təzyiqi artırır və bu da görmə qabiliyyətinin zəifləməsinə, hətta bəzi hallarda ciddi xəstəliklərə gətirib çıxara bilər.”
Həkim əlavə edib ki, gecə saatlarında ekran istifadəsi yuxu rejiminə də mənfi təsir göstərir: “Yatmazdan əvvəl monitor qarşısında vaxt keçirmək yuxu pozğunluqlarına səbəb olur. Hətta uzun müddət bu vərdiş davam edərsə, astiqmatizm kimi problemlər yarana bilər.”
Sonda mütəxəssis tövsiyə edib ki, “Yuxudan ən azı bir saat əvvəl ekran istifadəsi dayandırılmalıdır. Bu qaydalara əməl etməklə həm göz sağlamlığını qorumaq, həm də daha keyfiyyətli yuxu əldə etmək mümkündür.”