Aprelin 10-da Azərbaycan Dillər Universiteti Filologiya fakültəsinin nəzdində fəaliyyət göstərən Dünya ədəbiyyatı və nəzəriyyəsi kafedrasının təşkilatçılığı ilə “Ümummilli Lider Heydər Əliyev: Azərbaycan–Böyük Britaniya ədəbi-mədəni əlaqələrinə” həsr olunmuş tədbir keçirilib. Tədbirdə iki ölkə arasında bədii ədəbiyyatın formalaşdırdığı əlaqələrin tarixi inkişaf mərhələləri, qarşılıqlı təsir imkanları və müasir dövrdə əhəmiyyəti geniş şəkildə müzakirə olunub.
Tədbirin açılışında çıxış edən kafedra müdiri, professor Şahin Xəlilli ədəbiyyatın xalqlar arasında mənəvi körpü rolunu xüsusi vurğulayaraq, Azərbaycan və Böyük Britaniya ədəbiyyatları arasında formalaşan qarşılıqlı marağın mədəni dialoqu daha da dərinləşdirdiyini qeyd edib.
Daha sonra tədbirin qonağı, Azərbaycan Yazıçılar Birliyinin üzvü, filologiya üzrə fəlsəfə doktoru Rasim Nəbioğlu çıxışında iki ölkə arasında ədəbi əlaqələrin inkişafında bədii ədəbiyyatın aparıcı rolunu diqqətə çatdırıb, bu istiqamətdə yazılmış əsərlər, ədəbi təşəbbüslər və yaradıcı fəaliyyətlərin qarşılıqlı təsiri gücləndirdiyini bildirib.
Kafedranın filologiya üzrə fəlsəfə doktoru, dosent Ülviyyə Əliyeva Azərbaycan–Britaniya ədəbi əlaqələrinin tarixi inkişaf mərhələlərinə toxunaraq, bu münasibətlərin müxtəlif dövrlərdə məhz ədəbi nümunələr vasitəsilə formalaşdığını iştirakçıların diqqətinə çatdırıb.
Növbəti çıxış edən kafedranın filologiya üzrə fəlsəfə doktoru, baş müəllim Turan Kərimli ədəbi əlaqələr kontekstində professor Şahin Xəlillinin yaradıcılığını təhlil edərək, onun əsərlərində Azərbaycan və Qərb ədəbi ənənələrinin sintezinin mühüm elmi və estetik dəyər daşıdığını vurğulayıb.
Sonda kafedranın müəllimi Ləman Məmmədli çıxışında tərcümənin ədəbi əlaqələrin inkişafında mühüm rol oynadığını qeyd edərək, bədii mətnlərin bir dildən digərinə ötürülməsinin yalnız dil dəyişimi deyil, eyni zamanda mədəni və estetik dəyərlərin qarşılıqlı paylaşımı olduğunu bildirib.
Tədbir ədəbiyyatın birləşdirici gücü fonunda Azərbaycan–Böyük Britaniya ədəbi əlaqələrinin inkişaf perspektivləri ətrafında aparılan müzakirələrlə yekunlaşıb.
