“Son günlər bəzi məktəblərdə hicablı şagirdlərin təhsil müəssisəsindən uzaqlaşdırılması ilə bağlı yayılan məlumatlar cəmiyyətdə ciddi narahatlıq doğurub.”
Təhsil eksperti Əli Ələkbərov “Tehsil365”ə açıqlamasında bildirib ki, bu məsələ yalnız pedaqoji deyil, həm də hüquqi müstəvidə qiymətləndirilməlidir.
Onun sözlərinə görə, Azərbaycan Respublikasının Konstitusiyası hər bir vətəndaşa bərabər təhsil almaq hüququnu təmin edir və heç bir şəxs dini mənsubiyyətinə görə ayrı-seçkiliyə məruz qala bilməz. “Əgər şagird geyiminə görə dərslərdən uzaqlaşdırılırsa və bunun hüquqi əsası yoxdursa, bu açıq şəkildə qanun pozuntusudur. Məktəblərdə daxili qaydalar ola bilər, amma bu qaydalar Konstitusiyanın üzərində dayana bilməz. Heç bir daxili nizam-intizam qaydası şagirdin fundamental hüququ olan təhsil alma hüququnu məhdudlaşdıra bilməz.”
Ələkbərov əlavə edib ki, belə hallarda valideynlər və ya qanuni nümayəndələr Elm və Təhsil Nazirliyinə rəsmi şikayət edə, Ombudsmana müraciət edə bilərlər. Qanunsuz qərar qəbul edən vəzifəli şəxslər barəsində inzibati məsuliyyət tədbirləri tətbiq oluna bilər. Əgər hüquq pozuntusu daha ciddi xarakter daşıyırsa, intizam tədbirləri – töhmət, vəzifədən azad etmə və digər hüquqi məsuliyyətlər gündəmə gələ bilər.
Ekspertin fikrincə, ən vacib məqam məktəb rəhbərliyinin qanunvericiliyə uyğun davranmasıdır: “Şagirdlərin hüquqları qorunmalı, mübahisəli məsələlər qadağa və uzaqlaşdırma yolu ilə deyil, dialoq və hüquqi çərçivədə həll edilməlidir. Təhsil sistemi cəmiyyətin gələcəyini formalaşdırır. Bu sistemdə qanunun aliliyi, insan hüquqlarına hörmət və inklüziv yanaşma əsas prinsip olmalıdır.”