“Görmə zəifliyi zamanı eynək və ya kontakt linza seçimi hər kəs üçün eyni deyil və bu qərar fərdi yanaşma tələb edir. Miyopiya, Hipermetropiya, Astiqmatizm və Presbiopiya kimi fərqli görmə qüsurları seçimə birbaşa təsir edir. Ümumilikdə, eynəklər daha təhlükəsiz və rahat hesab olunsa da, bəzi hallarda kontakt linzalar daha uyğun və ya yeganə alternativ ola bilər.”
Oftalmoloq Rəşidəlizadə Ergün bu fikirləri “Tehsil365”ə açıqlamasında bildirib.Eynək və kontakt linza arasında seçim edərkən ilk növbədə xəstənin görmə problemi və fərdi xüsusiyyətləri nəzərə alınmalıdır. Onun sözlərinə görə, həkimlər ümumilikdə təhlükəsizlik və rahatlıq baxımından eynəyə daha çox üstünlük versələr də, bəzi xüsusi hallarda kontakt linzalar qaçılmaz seçimə çevrilir.
“Əslində ‘eynək daha yaxşıdır, yoxsa kontakt linza?’ sualına qəti cavab vermək düzgün deyil. Çünki burada əsas məsələ xəstənin məqsədi və görmə probleminin növüdür. Miyopiya, hipermetropiya və astiqmatizm kimi fərqli zəifliklər mövcuddur və bunlar bir-birindən fərqləndirilməlidir. Həmçinin presbiopiya adlanan vəziyyət var ki, bu da əsasən 45 yaşdan sonra yaranır və yaxına görmə zəifləyir.
Gənc xəstələrdə daha çox eynək və kontakt linza arasında seçim məsələsi ortaya çıxır. Xüsusilə astiqmatizm bəzən miyopiya və ya hipermetropiya ilə birlikdə müşahidə oluna bilər.
Eynək ən qədim və təhlükəsiz korreksiya üsullarından biridir. Gözlə birbaşa təmasın olmaması infeksiya riskini minimuma endirir, istifadəsi rahatdır və istənilən vaxt çıxarıla bilər.
Lakin bəzi hallarda kontakt linzalar yeganə seçim olur. Məsələn, burun və ya qulaq anatomiyasında problem olduqda, cərrahi müdaxilələrdən sonra və ya eynəyin düzgün oturması mümkün olmadıqda linzalardan istifadə edilir. Həmçinin yüksək dərəcəli görmə qüsurlarında eynək şüşələri çox qalın və ağır olduğu üçün kontakt linzalar daha uyğun sayılır. Bəzən isə kombinə olunmuş üsul – həm linza, həm də eynək birlikdə istifadə olunur.
Bəzi peşələrdə, məsələn, aktyorlar, televiziya işçiləri və aktiv həyat tərzi olan şəxslərdə də kontakt linzalar üstünlük təşkil edir. Digər tərəfdən, uşaqlar və yeniyetmələr arasında eynək taxmaq psixoloji narahatlıq yarada bilər və bu zaman həkim fərdi yanaşma seçir.
Ümumilikdə isə, tibbi baxımdan eynəklər daha təhlükəsiz hesab olunur. Onlar gözlə təmasda olmadığı üçün infeksiya və mexaniki zədələnmə riski azdır, istifadəsi isə daha sadə və rahatdır.”