Onun sözlərinə görə, əsas şərt dərsliklərin elektron versiyada mövcud olmasıdır.
Təhsil eksperti Məzahi Məmmədli “Tehsil365”ə açıqlamasında bildirib ki, ali təhsil müəssisələrində dərsliklərin elektron qaydada keçirilməsi indiki zamanda çox sadə bir prosedurdur.
Ekspert qeyd edib ki, dünya artıq sürətlə süni intellekti qəbul edib və onun sənayedə, təhsildə, hətta məişətdə tətbiqinə başlanılıb: “Biz yaşadığımız dövrdə bu prosesə yalnız ali təhsil müəssisələrində deyil, ümumitəhsil məktəblərində də keçid etməliyik. Əks halda gecikirik. Yaxın vaxtlarda buna keçid bir zərurət olacaq.”
Məmmədli vurğulayıb ki, tələbələrin kitabxanalarda uzun müddət vaxt itirməsinə ehtiyac qalmayacaq: “Artıq hər kəsin əlində planşet və smartfon var. Dərslik vəsaitlərini elektron resurslardan əldə etmək mümkündür. Bu həm vaxt itkisini azaldır, həm də tədrisi daha çevik və əlçatan edir.”
Onun fikrincə, ali təhsil müəssisələri mütləq şəkildə daşınan vəsaitlərdən elektron resurslara keçid etməli, təhsil prosesini müasir texnologiyalarla uyğunlaşdırmalıdır. “Bu gün ənənəvi dərsliklər üzərində israr etmək təhsilin inkişafını ləngidir. Elektron resurslar həm tələbələr, həm də müəllimlər üçün daha praktik və effektivdir.”