Balakən rayonunda Elm və Təhsil Nazirliyi tərəfindən həyata keçirilən “Elm və təhsil sahəsində ictimai təşəbbüslərin dəstəklənməsi” qrant müsabiqəsi çərçivəsində Azərbaycan Qızıl Aypara Cəmiyyətinin Balakən bölməsi tərəfindən həyata keçirilən “Oyunla oxuyaq” layihəsi uğurla davam edir və artıq bölgədə böyük maraq doğurur.
"Tehsil365" xəbər verir ki, layihə məktəbəqədər yaşlı uşaqların erkən inkişafını təmin etməklə yanaşı, onların təhsilə marağını artırmaq, sosial və yaradıcı bacarıqlarını formalaşdırmaq məqsədi daşıyır. Ən diqqətçəkən məqamlardan biri isə müasir yanaşmaların, o cümlədən süni intellekt elementlərinin təlim prosesinə inteqrasiya edilməsidir. Bu yenilik uşaqların öyrənmə prosesini daha maraqlı, dinamik və effektiv edir.
Layihənin həyata keçirilməsində təcrübəli və fədakar təlimçilər — Həsənova Aysu, Emçiyeva Günel Akif qızı, Hacıyeva Məlahət Baqret qızı və Gülnar müəllimə böyük sevgi və məsuliyyətlə iştirak edirlər. Qeyd edək ki, bu təlimçilər bir aylıq xüsusi hazırlıq təlimini uğurla başa vuraraq layihə çərçivəsində tərbiyəçi kimi fəaliyyətə başlamışlar. Onlar hər bir uşağa fərdi yanaşaraq, onların potensialını üzə çıxarmağa çalışır, təlim prosesini sevgi və qayğı ilə qururlar.
Məşğələlər zamanı uşaqlar rəsm çəkir, oyunlar oynayır, interaktiv tapşırıqlarla məşğul olur və yeni biliklər əldə edirlər. Süni intellekt dəstəyi ilə hazırlanan bəzi fəaliyyətlər isə onların diqqətini daha çox cəlb edir, düşünmə və öyrənmə qabiliyyətlərini inkişaf etdirir. Bu yanaşma uşaqlarda həm texnologiyaya maraq yaradır, həm də onları gələcəyin dünyasına daha hazır edir.
Valideynlər layihəni böyük məmnuniyyətlə qarşılayır. Onlar qeyd edirlər ki, uşaqların davranışında, ünsiyyətində və öyrənməyə həvəsində müsbət dəyişikliklər açıq şəkildə hiss olunur.
“Oyunla oxuyaq” layihəsi Balakəndə yalnız bir tədris proqramı deyil, həm də uşaqların xoşbəxt gələcəyinə atılan müasir və düşünülmüş addımdır. Bu təşəbbüs fidan balalarımızın həm bilikli, həm də texnologiya ilə ayaqlaşan bir nəslə çevrilməsinə töhfə verir.