Azərbaycan Dillər Universitetində (ADU) Roman dillərinin tərcümə nəzəriyyəsi və praktikası kafedrasının təşkilatçılığı ilə Tərcümə fakültəsinin fransız dili ixtisası üzrə təhsil alan tələbələr arasında 20 mart – Beynəlxalq Frankofoniya Gününə həsr olunmuş tədbir keçirilib.
“Tehsil365” xəbər verir ki, tədbirdə çıxış edən Tərcümə fakültəsinin dekanı, filologiya elmləri doktoru, professor Bənövşə Məmmədova və kafedranın müdiri, filologiya üzrə fəlsəfə doktoru, dosent Ülfət İbrahim Frankofoniya Gününün mahiyyəti və əhəmiyyəti barədə ətraflı məlumat veriblər. Qeyd olunub ki, Beynəlxalq Frankofoniya Təşkilatı çərçivəsində fransız dili və mədəniyyətinin təşviqi, həmçinin üzv ölkələr arasında əməkdaşlığın inkişafı əsas prioritet istiqamətlərdən biridir.
Tədbir çərçivəsində tələbələr arasında bilik müsabiqəsi təşkil olunub. Üç mərhələdən ibarət olan müsabiqədə iştirakçılar Frankofoniya Təşkilatına üzv ölkələrin tarixi, coğrafiyası, mədəniyyəti, ədəbiyyatı, qastronomiyası, idmanı və fransız dili ilə bağlı sualları cavablandıraraq öz bilik və bacarıqlarını nümayiş etdiriblər. Gərgin və maraqlı keçən yarışın yekununda ən yüksək nəticə göstərən tələbələr qalib elan olunublar.
Qaliblər Azərbaycanda fəaliyyət göstərən TotalEnergies şirkəti tərəfindən təqdim olunan hədiyyələrlə mükafatlandırılıb. Bununla yanaşı, kafedranın müəllimləri tərəfindən də iştirakçılara xatirə hədiyyələri və kitablar təqdim olunub.
Sonda çıxış edən müəllimlər Frankofoniya Gününün əhəmiyyətini bir daha vurğulayıb, bu kimi tədbirlərin tələbələrin dil bacarıqlarının inkişafına, dünyagörüşlərinin genişlənməsinə və beynəlxalq mədəniyyətlərə marağın artmasına mühüm töhfə verdiyini qeyd ediblər.
