Bakı Mühəndislik Universitetində (BMU) Rəqəmsal İnkişaf və Nəqliyyat Nazirliyinin tabeliyində fəaliyyət göstərən İnformasiya və Kommunikasiya Texnologiyaları Agentliyinin nümayəndələri ilə tələbələr arasında maarifləndirici görüş təşkil olunub.
“Tehsil365” xəbər verir ki, BMU-nun Müəssisələrlə əlaqələr və karyera mərkəzinin təşkilatçılığı ilə baş tutan görüşdə agentliyin əməkdaşı Nərmin Xanpəriyeva “Rəqəmsal hüquqlar və təhlükəsiz internet” mövzusunda təqdimatla çıxış edib. O, çıxışı zamanı rəqəmsal savadlılığın artırılmasının əhəmiyyətindən, istifadəçilərin istehlakçı hüquqlarından, telekommunikasiya və poçt xidmətlərindən düzgün istifadə qaydalarından bəhs edib.
Təqdimatda internet xidmətlərində yaranan problemlər, o cümlədən sürətin aşağı düşməsi hallarında provayderlərə müraciət qaydaları, möbil şəbəkə təhlükəsizliyi, şəxsi məlumatların qorunması, şifrə və təsdiqləmə kodlarının oğurlanması riskləri barədə ətraflı məlumat verilib. Həmçinin sosial media hesabları və bank kartlarının təhlükəsiz istifadəsi məsələlərinə də toxunulub.
Tədbirdə, eyni zamanda onlayn alış-veriş zamanı diqqətli olmağın vacibliyi vurğulanıb, rəsmi və etibarlı platformaların necə tanınması ilə bağlı iştirakçılara tövsiyələr verilib.
Tələbələr karyera imkanları, bir sıra təcrübə proqramları barədə də praktik bilgilər əldə ediblər və onları maraqlandıran suallar cavablandırılıb.
