Azərbaycan Dillər Universitetinin (ADU) Beynəlxalq jurnalistika şöbəsinin təşəbbüsü ilə “WUF13 tələbələrin maraq dairəsində” adlı tədbir təşkil olunub. Tədbirdə ADU-nun Azərbaycan ədəbiyyatı kafedrasının müdiri, akademik Muxtar İmanov, Beynəlxalq jurnalistika şöbəsinin müdiri, filologiya üzrə fəlsəfə doktoru Nərgiz Çərkəzqızı-Qurbanlı, WUF13 Azərbaycan əməliyyat şirkətinin kommunikasiya meneceri Emin Hüseynzadə, WUF13 üzrə siyasi ekspert Ülviyyə Zülfüqar və kafedranın müəllimi Aygün Rəhimova iştirak ediblər.
“Tehsil365” xəbər verir ki, jurnalistika ixtisası üzrə təhsil alan tələbələrin iştirakı ilə keçirilən tədbiri giriş nitqi ilə açan Nərgiz Çərkəzqızı-Qurbanlı Prezident İlham Əliyevin müvafiq sərəncamına əsasən 2026-cı ilin “Şəhərsalma və memarlıq ili” elan olunduğunu xatırladaraq, bu kimi təşəbbüslərin tələbələr üçün mühüm əhəmiyyət daşıdığını vurğulayıb. O, həmçinin tələbə jurnalistlərin fəallığını qeyd edərək bildirib ki, onların bir qismi sözügedən beynəlxalq tədbirdə könüllü kimi fəaliyyət göstərəcək.
Daha sonra çıxış edən WUF13 Azərbaycan əməliyyat şirkətinin kommunikasiya meneceri Emin Hüseynzadə cari ilin may ayının 17–22-də ölkəmizdə keçiriləcək Ümumdünya Şəhərsalma Forumunun 13-cü sessiyası haqqında ətraflı məlumat verib. O, təqdimatla çıxış edərək bildirib ki, forum çərçivəsində 350-dən artıq tədbirin təşkili nəzərdə tutulur və çoxsaylı beynəlxalq qonaqların iştirakı gözlənilir. Qeyd olunub ki, qlobal miqyasda urbanizasiya və mənzil problemi kimi aktual mövzular müzakirə olunacaq və tələbələrin bu tədbirlərdə iştirakı üçün geniş imkanlar yaradılıb.
WUF13 üzrə siyasi ekspert Ülviyyə Zülfüqar isə çıxışında tədbirin ölkəmizdə keçirilməsinin siyasi əhəmiyyətinə toxunaraq, Azərbaycanın beynəlxalq nüfuzunun artdığını diqqətə çatdırıb. O, ölkəmizin Cənubi Qafqaz regionundakı mövqeyi, həyata keçirilən “ağıllı şəhər” və “ağıllı kənd” layihələri, eləcə də “yaşıl enerji” siyasətinin prioritetləri barədə məlumat verib. Bildirilib ki, COP29-dan sonra belə mötəbər tədbirin Azərbaycanda keçirilməsi ölkəmizin təhlükəsiz və etibarlı məkan kimi tanındığını bir daha təsdiqləyir.
Akademik Muxtar İmanov isə Prezident İlham Əliyevin Ümumdünya Şəhərsalma Forumunun 13-cü sessiyasının keçirilməsi ilə bağlı sərəncamından bəhs edərək, xüsusilə azad olunmuş ərazilərdə aparılan genişmiqyaslı tikinti, quruculuq və abadlıq işlərini diqqətə çatdırıb. O, bu proseslərin beynəlxalq platformalarda təqdim olunmasının əhəmiyyətini vurğulayıb və tələbələri fəal iştirak etməyə çağırıb.
İnteraktiv formada keçən tədbirdə tələbələrin sualları cavablandırılıb, sonda iştirakçılara broşür və məlumat xarakterli materiallar təqdim olunub.
