Aprelin 15-də AMEA-nın akademik Ziya Bünyadov adına Şərqşünaslıq İnstitutunda böyük Azərbaycan şairi Məhəmmədhüseyn Şəhriyarın anadan olmasının 120 illiyinə həsr olunmuş “Milli ruhun təntənəsi - Məhəmmədhüseyn Şəhriyar” mövzusunda elmi konfrans keçirilib.
Bu barədə “Tehsil365” ə institutdan məlumat verilib. Bildirilib ki, konfransda AMEA-nın vitse-prezidenti, Şərqşünaslıq İnstitutunun direktoru akademik Gövhər Baxşəliyeva qüdrətli söz ustadı olan Məhəmmədhüseyn Şəhriyarın poeziyasının dövrün ictimai, siyasi, fəlsəfi və ədəbi görüşlərinin canlı aynası olduğunu deyib. O, şairin ölməz irsinin əbədi olmasını, nəinki Şərq, dünya mədəniyyəti və ədəbiyyatı xəzinəsinin nadir incisi olduğunu bildirib, onun ecazkar poeziyası ilə ürəkləri fəth etdiyini, geniş kütlələrin sonsuz məhəbbətini qazandığını, dildən-dilə düşmüş şeirlərinin bir çox dillərə tərcümə olunduğunu, insanların ruhunu oxşadığını qeyd edib.
Ulu Öndər Heydər Əliyevin müsahibələrinin birində “Sevdiyiniz şair?” sualına “Şəhriyar” deyə cavab verdiyini xatırladan G.Baxşəliyeva Ümummilli Liderin böyük şair barədə dediklərini xatırladıb: “Dahi sənətkarın yaradıcılığının dərindən öyrənilməsi, tədqiq və tədris edilməsi sənət və elm xadimlərimizin müqəddəs borcudur”.
Şərqşünaslıq İnstitutunun elmi işlər üzrə direktor müavini filologiya üzrə fəlsəfə doktoru, dosent Ruhəngiz Cümşüdlü “Əbədiyyət gülü - Şəhriyar” mövzusunda məruzə edib. R.Cümşüdlü Şəhriyarın fars və Azərbaycan dillərində yüksək poetik ruhlu şeirlər yaratdığını deyib, şairin fars dilində yaratdığı məhəbbət lirikasının fars ədəbiyyatının Sədi Şirazi, Hafiz Şirazi kimi dahilərinin lirikası ilə yanaşı çəkildiyini bildirib. Qeyd edib ki, şairin Azərbaycan dilindəki şeirlərində azərbaycançılıq ruhu, türk təfəkkürü öz ifadəsini tapıb. Azərbaycan həsrəti, Azərbaycanı tərənnüm Şəhriyar poeziyasının ana xəttini təşkil edir.
Konfransda institut əməkdaşlarının “Şəhriyar: zamanın və tarixin qiyməti”, “Can Rüstəm: Şəhriyar və Rüstəm Əliyev arasında dostluq əlaqəsi”, “İki dünyanın qovuşduğu zirvə - Məhəmmədhüseyn Şəhriyar timsalında” mövzusunda məruzələri dinlənilib, müzakirələr aparılıb, suallar cavablandırılıb