“Uşağın sinif yoldaşları ilə ünsiyyət qurmaqda çətinlik çəkməsi təkcə sosial münasibətlərə deyil, onun dərsə olan diqqətinə və öyrənmə prosesinə də birbaşa təsir göstərir. Bu hal uşağın daxili dünyasında davamlı gərginlik yaradır.”
Bu sözləri “Tehsil365” ə açıqlamasında , psixoloq Aytən Ələkbərova bildirib.
“Əgər uşaq sinifdə ətraf yoldaşları ilə ünsiyyət qura bilmirsə, bu onun fikrinin daim başqa məsələlərlə məşğul olmasına səbəb olur. Belə vəziyyətdə ona deyilən sözlər bəzən sanki ona çatmır, diqqəti dərsdən yayınır. Uşaqlarda bu hal daha güclü şəkildə özünü göstərir, çünki onlar yaşadıqları çətinlikləri nə valideynlərinə, nə də müəllimlərinə rahat şəkildə ifadə edə bilmirlər.”
“Onlar çox zaman bu vəziyyəti öz daxilində yaşayır, beynində müxtəlif ssenarilər qurur: sinif yoldaşına necə münasibət göstərməli olduğunu düşünür. Bəzi uşaqlar bu vəziyyətə reaksiya olaraq dərslərini daha yaxşı oxumağa çalışır, lakin bu, hər uşaqda eyni olmur. Burada uşağın psixi xüsusiyyətləri əsas rol oynayır. Elə hallar da olur ki, bu sosial çətinliklər onun dərs oxumasına ciddi mənfi təsir edir.”
“Məhz buna görə də müəllimlərin rolu çox önəmlidir. İbtidai sinif müəllimi, sinif rəhbəri və hətta digər müəllimlər belə bu kimi halları vaxtında aşkar etməli, uşağa dəstək olmalı və onun uyğunlaşmasına kömək etməlidir.”