Fransa Təhsil Nazirliyi ölkənin rəsmi saytında yaydığı açıqlamada kiberhücuma məruz qaldığını bildirib.
“Tehsil365" xarici mediaya istinadən xəbər verir ki, hadisə nəticəsində bəzi şagirdlərin şəxsi məlumatlarının sızdırıldığı müəyyən edilib.
Məlumata görə, sızan məlumatlar arasında şagirdlərin ad və soyadları, təhsil aldıqları məktəb və sinif məlumatları, e-poçt ünvanları, eləcə də EduConnect sistemində istifadə etdikləri giriş məlumatları və şifrələr yer alır.
Nazirliyin açıqlamasında qeyd olunub ki, EduConnect sisteminə bağlı şagird hesablarının idarə edilməsi xidmətinə qanunsuz girişlə həyata keçirilib. Belə ki, bir şəxs səlahiyyətli əməkdaşın kimliyindən sui-istifadə edərək sistemə daxil olub.
Təhlükəsizlik pozuntusu aşkar edilib və dərhal aradan qaldırılıb. Bununla yanaşı, məlumatları sızan şagirdlərin dəqiq sayının müəyyənləşdirilməsi üçün araşdırmalar davam edir.
Nazirlik hadisə ilə bağlı böhran qərargahı yaradıldığını və hüquq-mühafizə orqanlarına rəsmi şikayət edildiyini də açıqlayıb.