Onun sözlərinə görə, süni zəka nə qədər inkişaf etsə də, bu istiqamətdə tələbələrə yardım edə bilməz.
Təhsil eksperti Elçin Əfəndi “Tehsil365”ə açıqlamasında bildirib ki, ali təhsil müəssisələrinin əsas funksiyası yalnız bilik ötürmək deyil, tələbələrə təcrübə keçmək, sosiallaşmaq və laboratoriya şəraitində işləmək imkanı yaratmaqdır.
Ekspert qeyd edib ki, universitet sadəcə diplom verən yer deyil: “Tələbələr burada praktik bacarıqlar qazanır, sosial əlaqələr qurur, kollektiv mühitdə formalaşır. Süni zəka bu sahədə yalnız əlavə alət kimi istifadə oluna bilər.”
Əfəndi vurğulayıb ki, süni zəka dərslərin müəyyən hissəsini elektron qaydada keçirməyə imkan yaradır: “Məsələn, tələbələr həftənin iki günü universitetə gəlmədən, digər iki günü isə auditoriyada iştirak etməklə bilik və bacarıqlarını formalaşdıra bilərlər. Bu zaman auditoriyaya gəlmək daha çox məşğələ saatlarına aid olacaq, mühazirələri isə elektron resurslardan izləmək mümkün olacaq.”
Onun fikrincə, yaxın gələcəkdə bu model daha geniş tətbiq olunacaq: “Mühazirə saatlarında tələbəni universitetə gətirməyin mənası qalmayacaq. Çünki artıq süni zəka və elektron resurslar vasitəsilə tələbələr bilikləri rahatlıqla əldə edə biləcəklər. Auditoriya isə daha çox praktiki məşğələlər üçün istifadə olunacaq.”