Onun sözlərinə görə, bu məsələ yalnız pedaqoji deyil, həm də hüquqi müstəvidə qiymətləndirilməlidir və dövlət qurumları ilə yanaşı, valideynlərin də məsuliyyətli yanaşması vacibdir.
Təhsil eksperti Əli Ələkbərov “Tehsil365”ə açıqlamasında son dövrlərdə bəzi məktəbəqədər təhsil müəssisələrində uşaqlara yetərli nəzarətin olunmaması və onların təhlükəsizliyinin lazımi səviyyədə təmin edilməməsi ilə bağlı narahatedici hallara münasibət bildirib.
Onun sözlərinə görə, bu kimi hallar uşaqların fiziki və psixoloji sağlamlığı üçün ciddi risklər yaradır və cəmiyyət olaraq daha məsuliyyətli yanaşmanı tələb edir: “Uşaqların hüquqlarının qorunması və onların təhlükəsiz mühitdə böyüməsi dövlətin prioritet istiqamətlərindən biridir. Bu, qanunvericilikdə də açıq şəkildə təsbit olunub.”
Ələkbərov xatırladıb ki, “Təhsil haqqında” Qanunun 4-cü maddəsinə əsasən, təhsilin əsas məqsədlərindən biri sağlam və təhlükəsiz mühitdə şəxsiyyətin formalaşmasını təmin etməkdir. Həmin qanunun 11-ci maddəsində isə təhsilalanların həyat və sağlamlığının qorunmasının təhsil müəssisələrinin birbaşa vəzifəsi olduğu vurğulanır. Bundan əlavə, “Uşaq hüquqları haqqında” Qanunun 5-ci maddəsi uşaqların həyat və sağlamlığının qorunmasını dövlətin əsas vəzifəsi kimi müəyyən edir, 9-cu maddə isə onların təhlükəsiz şəraitdə yaşamaq və inkişaf etmək hüququnu təsbit edir.
Ekspert qeyd edib ki, məktəbəqədər təhsil müəssisələrinin fəaliyyəti ilə bağlı qaydalara görə, rəhbərlik uşaqların təhlükəsizliyinə birbaşa məsuliyyət daşıyır və hər hansı səhlənkarlıq hüquqi məsuliyyət yaradır: “Əgər bağçada uşağın təhlükəsizliyi təmin olunmursa, bu, təkcə pedaqoji məsələ deyil, həm də hüquqi məsuliyyət doğuran haldır.”
Əli Ələkbərov hesab edir ki, mövcud vəziyyəti nəzərə alaraq aidiyyəti dövlət qurumları – xüsusilə səhiyyə və təhsil sahəsinə nəzarət edən strukturlar – bağçalarda mütəmadi monitorinqlər keçirməli, yoxlamaları gücləndirməli və ictimai nəzarət mexanizmlərini genişləndirməlidir. “Bu, həm valideynlərin etimadını artıracaq, həm də uşaqların təhlükəsizliyinin təmin olunmasına xidmət edəcək.”
Ekspert vurğulayıb ki, uşaqlar cəmiyyətin ən həssas təbəqəsidir və onların qorunması hər birimizin ortaq məsuliyyətidir: “Bağçalarda uşaqların təhlükəsizliyi yalnız dövlət qurumlarının deyil, həm də cəmiyyətin diqqət mərkəzində olmalıdır. Çünki sağlam və təhlükəsiz mühitdə böyüyən uşaq gələcəyin sağlam və güclü vətəndaşı deməkdir.”