İRS” beynəlxalq jurnalının ərəb dilində növbəti buraxılışı işıq üzü görüb.
“Tehsil365” xəbər verir ki, jurnalın bu buraxılışı 44 günlük Vətən müharibəsində qazanılmış tarixi Zəfərin 5-ci ildönümünə həsr olunub. Buraxılışda Azərbaycanın müasir inkişafını, tarixi irsini və beynəlxalq münasibətlərini müxtəlif aspektlərdən işıqlandıran elmi və publisistik məqalələr yer alıb.
Misirli tədqiqatçı Əhməd Tərabikin “Azərbaycan və İslam Əməkdaşlıq Təşkilatı: İslam dünyasında səmərəli tərəfdaşlığın nümunəsi” adlı məqaləsində ölkəmizin İslam aləmində rolu və beynəlxalq əməkdaşlığa töhfələri təhlil edilib.
Milli Məclisin deputatı, Beynəlxalq Münasibətlərin Təhlili Mərkəzinin İdarə Heyətinin üzvü Gülşən Paşayevanın “Qadın İslam və mədəni müxtəliflik arasında: Azərbaycan təcrübəsinə baxış” məqaləsində Azərbaycan qadınının cəmiyyətdəki mövqeyi və multikultural mühitdə rolu araşdırılıb.
Misirin Ayn Şəms Universitetinin professoru, filologiya üzrə fəlsəfə doktoru, azərbaycanşünas alim Əhməd Sami əl-Aydinin “İkinci Qarabağ müharibəsinin 5 ili: Qələbə, yenidənqurma və sülh yoluna baxış” məqaləsində işğaldan azad olunmuş ərazilərdə aparılan bərpa işləri və gələcək inkişaf perspektivləri təqdim edilib.
Azərbaycan İlahiyyat İnstitutunun rektoru, ilahiyyat üzrə fəlsəfə doktoru Aqil Şirinovun “Azərbaycanda birgəyaşayış ənənəsi: Unikal tarixi təcrübə” yazısı isə ölkəmizdə tolerantlıq və multikulturalizm ənənələrinin tarixi köklərini işıqlandırıb.
Jurnalın bu buraxılışında Azərbaycan ilə ərəb dünyası arasında mədəni və elmi əlaqələrə, memarlıq irsinə və təbiət gözəlliklərinə həsr olunmuş məqalələr də yer alıb. Misir-Azərbaycan Dostluq Cəmiyyətinin İdarə Heyətinin sədri, Dünya Azərbaycanlı Alimlər Birliyinin həmsədri Seymur Nəsirovun “Azərbaycan və ərəblər arasında elmi və mədəni körpülər” yazısı, Azərbaycan Memarlar İttifaqının Memarlıq irsi üzrə komissiyasının sədri Rizvan Bayramovun Bakının memarlığında “Art Nouveau” üslubuna dair araşdırması oxuculara təqdim edilib.
Buraxılışda Azərbaycan ədəbiyyatına həsr olunmuş məqalə də yer alıb. Məqalədə filologiya elmləri doktoru yazıçı Vaqif Sultanlının yaradıcılığı, elmi fəaliyyəti və onun “Səhra savaşı” romanının fəlsəfi məzmunu geniş şəkildə təhlil olunub.
Beləliklə, “İRS” jurnalının ərəb dilində yeni buraxılışı mövzu müxtəlifliyi, elmi dərinliyi və mədəni zənginliyi ilə seçilərək Azərbaycanın tarixi irsini, milli kimliyini və müasir inkişaf yolunu hərtərəfli şəkildə təqdim edib.