Payızda olduğu kimi, yaz aylarında da insanlarda depressiya halları müşahidə olunur. Baxmayaraq ki, yaz yenilənmə mövsümü hesab olunur, lakin bu dönəmdə bəzi şəxslər özlərini daha gərgin hiss edə, ruh düşkünklüyü yaşaya bilirlər.
Bəs yaz depressiyası payız depressiyasından nə ilə fərqlənir? Bu dönəmdə nələrə fikir verilməlidir?
“Tehsil365” xəbər verir ki, psixoloq Gülnar Orucova Bizim.Media-ya açıqlamasında bildirib ki, yaz depressiyası insanı aqressiv, payız depressiyası isə üzüntülü hiss etdirir:
“İnsanlarda yaz depressiyası daha çox görülür, nəinki payız depressiyası. Narahat, gərgin, iradəsi zəif, tez küsən, çox üzülən insanlarda yaz depressiyası daha çox ortaya çıxa bilir. Bu insanlarda yazda çıxan günəş hormonal bazansı poza bilər. Bu da özü ilə daxili narahatlıq, yuxu pozuntusu, təşviş pozuntuları, iştahın azalması, arıqlama, yuxunun 4 saata qədər enməsi kimi hallar gətirir.
Payız depressiyasında isə şəxs daha çox yatmaq istəyir, kökəlməyə meyilli olur, daha çox üzüntü içində olur. Yaz depressiyası insanı aqressiv, payız depressiyası isə üzüntülü hiss etdirir”.
Psixoloqun sözlərinə görə, həm payız, həm yaz depressiyasında olan insanlar bu haldan çıxmaq üçün aktiv həyat tərzi keçirməlidir:
“Yaz depressiyasında olanlar özlərini başqaları ilə müqayisə edir və ruh hallarını daha da ağırlaşdırırlar. Bu cür insanlarda “hamı xoşbəxtdir, mən deyiləm” kimi fikirlərdən uzaq olmaq lazımdır. Həmçinin, bu dönəmdə qida balansını da normallaşdırmaq vacibdir”.