Onun sözlərinə görə, xüsusilə uşaqlıq və yeniyetməlik dövründə yaşanan bu təcrübə şəxsiyyətin formalaşmasına, özünə münasibətə və sosial davranışlara birbaşa təsir edir.
Psixoloq Mətanət Əliyeva “Tehsil365”ə açıqlamasında bildirib ki, bulinqə məruz qalmaq insanın psixoloji sağlamlığına çoxşaxəli və uzunmüddətli təsirlər göstərən ciddi bir problemdir.
Əliyeva qeyd edib ki, qısa müddətdə bulinqə məruz qalan uşaqlarda qorxu, narahatlıq, utanc, günahkarlıq və dəyərsizlik hissləri yaranır. Bu, onların emosional stabilliyini pozur, məktəbə getmək istəksizliyi, dərslərə marağın azalması, diqqət və yaddaş problemləri ilə nəticələnə bilər. Sosial baxımdan isə uşaq özünü təcrid etməyə başlayır, dost münasibətlərindən uzaqlaşır və ünsiyyətdən qaçır.
Ekspert vurğulayıb ki, uzunmüddətli perspektivdə bulinqin təsirləri daha ağır ola bilər: “Bu cür təcrübə insanın özünə inamını zəiflədir, gələcək münasibətlərdə güvənsizlik yaradır, depressiya və davamlı anksiyetə riskini artırır. Bəzi hallarda isə aqressiv davranışların artmasına səbəb olur.”
Onun sözlərinə görə, bulinqin psixoloji təsiri yalnız fərdi səviyyədə qalmır, uşağın akademik inkişafına, motivasiyasına və ümumilikdə həyat keyfiyyətinə də mənfi təsir göstərir. Buna görə də bu məsələyə sadəcə “uşaqlar arasında mübahisə” kimi deyil, ciddi psixoloji və sosial problem kimi yanaşmaq vacibdir.
Mətanət Əliyeva qarşısının alınması üçün ən vacib addımın erkən fərqindəlik olduğunu bildirib: “Valideynlər və müəllimlər uşağın davranışındakı dəyişiklikləri vaxtında hiss etməli, onu dinləməli və təhlükəsiz mühit yaratmalıdır. Uşağa emosiyalarını ifadə etməyi öyrətmək, özünü müdafiə bacarıqlarını inkişaf etdirmək və sosial dəstək sistemini gücləndirmək çox vacibdir.”
Ekspert əlavə edib ki, bulinq davamlı xarakter alarsa, psixoloq dəstəyi mütləqdir. Psixoloji müdaxilə uşağın özünə inamını bərpa etməyə, travmatik təsirləri azaltmağa və sağlam emosional reaksiyalar formalaşdırmağa kömək edir. “Bulinq yalnız həmin an yaşanan bir hadisə deyil, uşağın daxili dünyasında iz buraxan və gələcək həyatına təsir edə bilən bir təcrübədir. Amma düzgün yanaşma və vaxtında müdaxilə ilə bu təsirlərin qarşısını almaq mümkündür.”