Azərbaycan ədəbiyyatında mühüm yer tutan yazıçı, nasir və dramaturq Mehdi Əli oğlu Hüseynov 1909-cu ilin aprel ayında Qazax qəzasının İkinci Şıxlı kəndində anadan olmuşdur.
“Tehsil365” xəbər verir ki, O, yaradıcılığı ilə milli ədəbiyyatın inkişafına əhəmiyyətli töhfələr vermişdir.
Mehdi Hüseyn həm bədii yaradıcılığı, həm də ədəbi-tənqidi fəaliyyəti ilə tanınmışdır. Onun əsərləri dövrün ictimai-siyasi hadisələrini əks etdirməklə yanaşı, insan xarakterlərini və həyatın müxtəlif tərəflərini dolğun şəkildə təqdim etmişdir.
Yazıçı 1958–1965-ci illərdə Azərbaycan Sovet Yazıçıları İttifaqının sədri vəzifəsində çalışmış, 1964-cü ildə isə Azərbaycan SSR xalq yazıçısı fəxri adına layiq görülmüşdür. 1950-ci ildə “Stalin” mükafatı laureatı olması onun yaradıcılığına verilən yüksək qiymətin göstəricisidir.
Mehdi Hüseyn 10 mart 1965-ci ildə Bakı şəhərində vəfat etmişdir. Onun zəngin ədəbi irsi Azərbaycan mədəniyyətinin dəyərli hissəsi kimi bu gün də yaşayır və oxucular tərəfindən maraqla qarşılanır.