Azərbaycan musiqi sənətinin görkəmli nümayəndələrindən biri, bəstəkar Ramiz Aqil oğlu Mirişli 16 aprel 1934-cü ildə Naxçıvanda anadan olmuşdur.
“Tehsil365” xəbər verir ki, O, yaradıcılığı ilə milli musiqi mədəniyyətinin inkişafına mühüm töhfələr vermişdir.
Ramiz Mirişli müxtəlif janrlarda yazdığı əsərlərlə tanınmış, musiqilərində milli motivləri müasir üslubla ustalıqla birləşdirmişdir. Onun bəstələri geniş dinləyici auditoriyası tərəfindən sevilmiş və Azərbaycan musiqi xəzinəsində özünəməxsus yer tutmuşdur.
Bəstəkarın fəaliyyəti dövlət tərəfindən yüksək qiymətləndirilmişdir. O, 1974-cü ildə Naxçıvan MSSR, 1982-ci ildə isə Azərbaycan SSR əməkdar incəsənət xadimi fəxri adlarına layiq görülmüş, 1990-cı ildə Azərbaycan SSR xalq artisti adına layiq görülmüşdür. 1993-cü ildə professor elmi adını almışdır.
Ramiz Mirişli 17 aprel 2015-ci ildə Bakı şəhərində vəfat etmişdir. Onun zəngin yaradıcılığı Azərbaycan musiqi irsinin dəyərli hissəsi kimi bu gün də yaşayır.