“Gənclərin xarici ölkələrin nüfuzlu ali təhsil müəssisələrində təhsil almalarına dair 2022–2028-ci illər üçün Dövlət Proqramı” iştirakçıları təhsillərini başa vurduqdan sonra ölkəyə qayıtmalıdırlar. Bu, proqramın əsas şərtlərindən biri kimi müəyyənləşdirilib. Proqram çərçivəsində təhsil alanların qarşısına dövlət tərəfindən 5 illik əmək fəaliyyəti öhdəliyi qoyulur. Bu yanaşmanın məqsədi xaricdə əldə olunan bilik və təcrübənin ölkənin inkişafına yönəldilməsidir.
“Tehsil365" xəbər verir ki, bunu Dövlət Proqramı İdarəetmə Qrupunun layihə rəhbəri Qədir Xəlilov proqramın təqdim etdiyi imkanlara həsr olunmuş tədbirdə deyib. Onun sözlərinə görə, bu yanaşma dövlətin neft kapitalını insan kapitalına çevirməsi baxımından əhəmiyyət daşıyır: “Digər ölkələrin təcrübəsinə uyğun olaraq tətbiq edilən 5 illik öhdəlik əvvəlki illərdə bəzi narazılıqlara səbəb olsa da, hazırda namizədlər arasında buna münasibət daha müsbətdir.
Bəzi tələbələr xaricdə təhsil aldıqları müddətdə “Google”, “Microsoft” kimi nüfuzlu şirkətlərdə iş imkanları əldə etdiklərini bildirərək ölkəyə qayıtmamaq istədikləri barədə müraciət edirlər. Lakin qaydalara əsasən, hər bir iştirakçı təhsilini başa vurduqdan sonra Azərbaycana qayıtmalı və azı beş il ölkədə fəaliyyət göstərməlidir”.