Onun sözlərinə görə, asılılıq yalnız fiziki deyil, həm də psixoloji səbəblərə bağlıdır və bu səbəblərin aradan qaldırılması üçün mütləq psixoloji dəstək alınmalıdır.
Psixoloq Fəridə Musəvi “Tehsil365”ə açıqlamasında bildirib ki, insan təkrar-təkrar eyni davranış modelinə qayıdırsa, bu artıq asılılıq göstəricisidir.
Ekspert vurğulayıb ki, asılılıq zamanı insan özünü aldatma mexanizminə keçir: “Şəxs fərqindədir ki, bu davranış ona zərər verir, amma asılılıq formalaşdığı üçün özünə bəhanələr tapır, təsəlli verir. Bu isə vərdişi getdikcə xroniki hala gətirir.”
Musəvi qeyd edib ki, xronikləşmiş asılılıq daha çətin müalicə olunur və bəzən tam xilas olmaq mümkün olmur. Bu səbəbdən erkən müdaxilə çox vacibdir: “İnsan zamanında görür ki, davranış artıq asılılıq yönü alıb, onda psixoloji dəstək almaq mütləqdir. Psixoloq köməyi ilə kök səbəblər – duyğular, düşüncələr və davranış modelləri korreksiya olunur.”
Psixoloqun fikrincə, asılılıq bütün vərdişlərə aid ola bilər və vaxtında müdaxilə edilmədikdə insanın həyat keyfiyyətini ciddi şəkildə zəiflədir. Buna görə də psixoloji dəstək həm profilaktika, həm də müalicə baxımından əsas rol oynayır.