Məktəbəqədər təhsil sahəsində valideynlərin qarşısında duran əsas seçimlərdən biri də dövlət və özəl bağçalar arasında qərar verməkdir. Hər iki modelin öz üstünlükləri və çatışmazlıqları mövcuddur. Bəs əsas fərqlər nədədir?
Mövzu ilə bağlı məktəbəqədər təhsil üzrə ekspert Töhfə Mustafayeva “Tehsil365"ə açıqlama verib.
Ekspert bildirib ki, “Dövlət və özəl bağçalar arasındakı əsas fərq ilk növbədə idarəetmə və resurs imkanları ilə bağlıdır.”
Onun sözlərinə görə, dövlət bağçalarında daha çox standartlaşmış sistem tətbiq olunur: “Dövlət müəssisələrində proqram və qaydalar mərkəzləşdirilmiş şəkildə müəyyən edilir. Bu, müəyyən sabitlik yaratsa da, bəzən çevik yanaşmanı məhdudlaşdıra bilər.”
Özəl bağçalarla bağlı isə ekspert qeyd edib: “Özəl müəssisələr daha çevik və fərdiləşdirilmiş yanaşma tətbiq etmək imkanına malikdir. Onlar proqramı daha rahat dəyişə, valideyn tələbinə uyğunlaşa bilirlər.”
Ekspert vurğulayıb ki, maddi faktor da mühüm rol oynayır: “Özəl bağçalarda ödəniş yüksək olduğu üçün əlavə imkanlar – kiçik qruplar, fərdi yanaşma, əlavə fəaliyyətlər daha çox olur. Dövlət bağçalarında isə bu imkanlar daha məhdud ola bilər.”
Bununla yanaşı, o əlavə edib ki, keyfiyyət yalnız müəssisə növündən asılı deyil: “Həm dövlət, həm də özəl bağçalar arasında çox yaxşı və zəif nümunələr var. Əsas fərqi müəllimlərin peşəkarlığı və idarəetmənin keyfiyyəti müəyyən edir.”
Ekspert valideynlərin seçim zamanı diqqətli olmalı olduğunu qeyd edib: “Valideynlər yalnız ad və ya qiymətə görə deyil, mühitə, müəllimlərin yanaşmasına və uşağın orada necə hiss etdiyinə görə qərar verməlidirlər.”
Sonda ekspert bildirib ki, “Ən yaxşı bağça uşağın özünü təhlükəsiz, rahat və maraqlı hiss etdiyi mühitdir. Bu isə həm dövlət, həm də özəl müəssisədə mümkündür.”