Azərbaycanda tarixi abidələrin qorunması dövlət siyasətinin mühüm tərkib hissəsidir. Əsası Ümummilli Lider Heydər Əliyev tərəfindən qoyulan və Prezident İlham Əliyev tərəfindən uğurla davam etdirilən milli mədəniyyət siyasəti bu sahədə əldə olunan nailiyyətlərin əsasını təşkil edir.
“Tehsil365" xəbər verir ki, bu fikirlər 18 Aprel - Beynəlxalq Abidələr və Tarixi Yerlər Günü münasibətilə Şəkidə keçirilən “Şəhərsalma və memarlıq üslubunu əsrlərdir yaşadan Şəki” adlı tədbirdə səsləndirilib.
“Şəhərsalma və Memarlıq İli” çərçivəsində Şəki Şəhər İcra Hakimiyyəti, “Yuxarı Baş” Milli Tarix Memarlıq Qoruğu və Şəki şəhər Heydər Əliyev Mərkəzinin birgə təşkilatçılığı ilə keçirilən tədbirdə təşkilatçı qurumların rəhbər şəxsləri və əməkdaşları, memarlar, idarə və təşkilatların, ictimaiyyətin nümayəndələri iştirak ediblər.
Şəki şəhər Heydər Əliyev Mərkəzində keçirilən tədbirdən öncə iştirakçılar Beynəlxalq Abidələr və Tarixi Yerlər Gününə həsr olunmuş yerli sənətkarların əl işlərindən ibarət rəsm sərgisi ilə tanış olublar.
Tədbir Dövlət Himninin səsləndirilməsi ilə başlayıb, şəhidlərin xatirəsi bir dəqiqəlik sükutla yad edilib.
Sonra “Yuxarı Baş” Milli Tarix-Memarlıq Qoruğunun əməkdaşlarının hazırladığı videoçarx nümayiş olunub.
Şəki Şəhər İcra Hakimiyyəti başçısının müavini Elman İmamverdiyev “Azərbaycanda 2026-cı ilin “Şəhərsalma və Memarlıq İli” elan edilməsi və BMT Ümumdünya Şəhərsalma Forumunun On Üçüncü Sessiyasının Bakıda keçirilməsinin Azərbaycanda dayanıqlı şəhərsalma proseslərində rolu”, Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin Qəbələ Regional İdarəsinin rəisi vəzifəsinin səlahiyyətlərini icra edən Tərxan Tahirli “18 Aprel - Beynəlxalq Abidələr və Tarixi Yerlər Gününün kontekstində Azərbaycanın mədəni irs siyasəti” mövzularında çıxış ediblər.
“Yuxarı Baş” Milli Tarix-Memarlıq Qoruğunun baş memarı Sehran Məmmədovun “Bölgə memarlıq abidələri cizgilərdə”, Dövlət Turizm Agentliyinin Qoruqları İdarəetmə Mərkəzinin elmi işçisi Zəminə Rəsulovanın “Şəki- təbii yollarla qurulmuş ağıllı şəhər modelidir” mövzularında təqdimatları keçirilib.
Sonda Beynəlxalq Abidələr və Tarixi Yerlər Günü münasibətilə Şəki şəhərinin mədəni irsinin qorunması sahəsində səmərəli fəaliyyətinə görə bir sıra qurumlar şəhər icra hakimiyyəti tərəfindən təltif edilib.